पालकमंत्री बोर्डीकर यांचा पुढाकार, सुशील घुंबरे यांच्या कलेचा गौरव
पाथरी : छत्रपती शिवाजी महाराजांच्या १२ गड-किल्ल्यांची नुकतीच जागतिक वारसा स्थळांच्या यादीत ऐतिहासिक नोंद झाली आहे. या पार्श्वभूमीवर, पाथरी (जि.परभणी) तालुक्यातील वाघाळा येथील युवा चित्रकार सुशील घुंबरे यांनी स्वहस्ते बनवलेली रायगड किल्ल्याची प्रतिकृती असलेले “जपतो आम्ही शिवछत्रपतीचा वारसा” या कॅनव्हास पेंटिंगने मंगळवारी, २९ जुलै रोजी मंत्रालयातील मुख्यमंत्र्यांच्या दालनात स्थान मिळविले आहे.
परभणी जिल्ह्याच्या पालकमंत्री मेघना बोर्डीकर यांच्या पुढाकारातून कॅबिनेट बैठक संपल्यानंतर हे पेंटिंग मुख्यमंत्री देवेंद्र फडणवीस यांना भेट देण्यात आले. या वेळी मंत्री गिरीश महाजन, अतुल सावे, आमदार मोनिका राजळे, सीमा हिरे, सुरेश धस, आणि खासदार रणजित नाईक निंबाळकर तसेच हनुमान घुंबरे आदींची उपस्थिती होते. राज्य सरकारच्या विशेष प्रयत्नांमुळे काही दिवसांपूर्वी स्वराज्यातील १२ गडकिल्ल्यांना युनेस्कोने जागतिक वारसा स्थळांच्या यादीत समाविष्ट केले आहे, याचा आनंद महाराष्ट्रासह देशातील सर्व शिवप्रेमींना झाला आहे. राज्यमंत्री तथा पालकमंत्री मेघना बोर्डीकर यांनी चित्रकार सुशील घुंबरे यांना त्यांच्या कलेला वाव मिळावा म्हणून छत्रपती शिवराय व किल्ले रायगडाची कलात्मक अशी एक पेंटिंग तयार करण्यास सांगितले होते. सुशील घुंबरे यांनी अगदी कमी वेळेत हे अतिशय सुंदर शिवाजी महाराजांचे पेंटिंग तयार केले. घुंबरे यांच्या कलेचे मुख्यमंत्री देवेंद्र फडणवीस यांनी भरभरून कौतुक केले आहे.
