प्रा.किरण सोनटक्के यांचे प्रतिपादन, रायरेश्वर विद्यालयात ध्वजारोहण उत्साहात
परभणी : जुलमी आणि हुकूमशाही निजाम सत्तेविरोधातील मराठवाडा मुक्तीसंग्रामाचा इतिहास जाज्वल्य आहे. या लढ्यात सर्वस्व पणाला लावलेल्या शूरवीरांचा त्याग, समर्पण आणि शौर्य येणाऱ्या अनेक पिढ्यांसाठी प्रेरणादायी ठरणारे आहे, असे प्रतिपादन धर्मापुरी येथील ज्ञानसाधना प्रतिष्ठानचे संस्थापक अध्यक्ष प्रा.किरण सोनटक्के यांनी केले.
रायरेश्वर माध्यमिक उच्च माध्यमिक विद्यालयात मराठवाडा मुक्ती संग्राम दिनानिमित्त गुरुवारी प्रा. सोनटक्के यांच्या हस्ते ध्वजारोहण करण्यात आले. त्या वेळी ते बोलत होते.
प्रारंभी थोर नेते स्वामी रामानंद तीर्थ व लोहपुरुष सरदार वल्लभभाई पटेल यांच्या प्रतिमांचे पूजन करण्यात आले. स्काऊट गाईड पथकाने पथसंचलन करून मानवंदना दिली. समन्वयक नवनाथ सोनटक्के यांनी मराठवाडा मुक्ती संग्राम दिनाचा इतिहास आणि महत्व सांगितले. आठवीच्या विद्यार्थ्यांनी तयार केलेल्या भित्तीपत्रकाचे विमोचन झाले. सूत्रसंचालन पवार यांनी केले. श्री.डोंबे, नईम शेख, जोशी, पवार, रासकटला व सर्व शिक्षक व शिक्षकेत्तर कर्मचारी इत्यादींनी परिश्रम घेतले.
