हेलस सानेगुरुजी कथामालेच्या जिल्हास्तरीय कथाकथन स्पर्धेला प्रतिसाद
सेलू : अखिल भारतीय साने गुरुजी कथामाला शाखा हेलस (जि. जालना) व मानस फाऊंडेशन यांच्या संयुक्त विद्यमाने पूज्य सानेगुरुजी यांच्या जयंतीनिमित्त २४ डिसेंबर रोजी आयोजित मराठवाडा विभागीय कथाकथन स्पर्धेअंतर्गत परभणी जिल्हास्तरीय फेरी बुधवारी सेलू येथील नूतन विद्यालयाच्या कै. रा. ब. गिल्डा सभागृहात मोठ्या उत्साहात पार पडली.
या स्पर्धेचे उद्घाटन उपमुख्याध्यापक किरण देशपांडे यांच्या हस्ते करण्यात आले. यावेळी साने गुरुजी कथामालेचे केंद्रीय कार्यकारिणी सदस्य सतीश कुलकर्णी व प्रमोद देशमुख यांची प्रमुख उपस्थिती होती. या स्पर्धेत बालगट आणि किशोर गट अशा दोन गटांत एकूण ४८ स्पर्धकांनी आपली कला सादर केली. यामध्ये बालगटातून ३३ तर किशोर गटातून १५ स्पर्धकांचा समावेश होता.
स्पर्धेच्या निकालामध्ये बालगटात अक्षरा गजानन पवार (नूतन कन्या प्रशाला, सेलू) आणि साक्षी कृष्णा राठोड (जि. प. शाळा, पारडी) यांनी प्रथम क्रमांक विभागून पटकावला. द्वितीय क्रमांक अनया विजय ढाकणे हिने मिळवला, तर तृतीय क्रमांक मनवा प्रमोद देशमुख आणि सिया मदन गरगटे यांना विभागून देण्यात आला. तसेच ईश्वरी अमोल राठोड हिला उत्तेजनार्थ पारितोषिक मिळाले.किशोर गटामध्ये श्रद्धा दिगंबर काकडे (नूतन कन्या प्रशाला, सेलू) हिने प्रथम क्रमांक मिळवून यश संपादन केले. द्वितीय क्रमांक सय्यद सना शौकत आणि लावण्या दीपक शेरे यांनी विभागून पटकावला. तृतीय क्रमांक स्वरा सुदीप देशपांडे हिला मिळाला, तर अमृता दिगंबर हरकळ हिला उत्तेजनार्थ पारितोषिक देऊन गौरविण्यात आले.
ज्येष्ठ नाट्यकर्मी रवींद्र मुळावेकर व सुभाष मोहकरे यांनी परीक्षक म्हणून काम पाहिले. विजेत्यांना पर्यवेक्षक रोहिदास मोगल यांच्या हस्ते बक्षिसे प्रदान करण्यात आली. कार्यक्रमाचे सूत्रसंचालन व प्रास्ताविक जिल्हा संयोजक डॉ. काशिनाथ पल्लेवाड यांनी केले, तर आभार बाळू बुधवंत यांनी मानले. या वेळी कीर्ती राऊत, वर्षा कदम, भगवान पावडे आदींसह मान्यवरांची उपस्थिती होती. स्पर्धा यशस्वी करण्यासाठी शिक्षक, पालक आणि कथामाला कार्यकर्त्यांनी परिश्रम घेतले.
