सेलू येथील मुख्याध्यापकांचे तहसीलदारांना निवेदन
ऑनलाइन कामे आणि अशैक्षणिक जबाबदाऱ्यांमुळे विद्यार्थ्यांच्या गुणवत्तेवर परिणाम होत असल्याचा दावा
सेलू | प्रतिनिधी : शहरातील प्राथमिक व माध्यमिक शाळांमधील शिक्षकांना बीएलओ (BLO) कामातून कार्यमुक्त करावे, या मागणीसाठी खासगी शाळांच्या मुख्याध्यापकांनी तहसीलदार कार्यालयात निवेदन दिले आहे.
गेल्या अनेक वर्षांपासून शिक्षक राष्ट्रीय कर्तव्य म्हणून बीएलओ आणि मास्टर ट्रेनरची जबाबदारी पार पाडत आहेत. मात्र, सध्याच्या स्थितीत शिक्षकांवर ऑनलाइन कामांचा प्रचंड बोजा वाढला असून, त्याचा थेट परिणाम शालेय अध्यापनावर होत असल्याचे या निवेदनात नमूद करण्यात आले आहे.शिक्षकांना सध्या निपुण चाचण्या, आधार अपडेशन, अपार आयडी, स्विफ्ट चॅट उपस्थिती, यु-डायस, आय गॉट कर्मयोगी आणि स्टुडन्ट पोर्टल यांसारखी अनेक तांत्रिक कामे सांभाळावी लागतात. या ऑनलाइन कामांमुळे आणि निवडणुकांशी संबंधित ड्युटीमुळे शिक्षकांना वर्गात नियमित अध्यापन करणे शक्य होत नाही. अध्यापनातील या खंडामुळे विद्यार्थी आणि पालकांमध्ये नाराजी असून, अनेक शाळांमधील विद्यार्थी संख्या घटत आहे. पटसंख्या कमी झाल्यामुळे संचमान्यतेत शिक्षक पदे कमी होण्याचे संकटही उभे ठाकले आहे.शाळेत पुरेसे कर्मचारी उपलब्ध नसल्याने आणि असलेले कर्मचारी बीएलओ कामात व्यस्त असल्याने वरिष्ठ कार्यालयाने मागवलेली माहिती वेळेवर देणे जिकिरीचे झाले आहे. बीएलओ कामासाठी वेळेचे कोणतेही बंधन नसल्याने आणि एकापाठोपाठ येणाऱ्या निवडणुकांमुळे काही शिक्षक वर्षानुवर्षे याच कामात अडकून पडले आहेत. विद्यार्थ्यांचे शैक्षणिक नुकसान टाळण्यासाठी तहसीलदार साहेबांनी या प्रश्नाचा सहानुभूतीपूर्वक विचार करून शिक्षकांना या कामातून मुक्त करावे, अशी मागणी मुख्याध्यापकांनी केली आहे.या निवेदनावर मुख्याध्यापक धनंजय भागवत, आर. एस. मोगल, पी. टी. कपाटे, आर. एल. थटवले, डी. डी. शिंदे, आर. जी. गोरे, आर. बी. पाठक, एस. एस. धारासूरकर, जी. आर. साळवे आणि यु. जी. पांडे यांच्यासह इतर शिक्षकांच्या स्वाक्षऱ्या आहेत.
