सेलूतील विवेकानंद नगरात जमली भक्तांची मांदियाळी
सेलू जि.परभणी : ‘गण गण गणात बोते’च्या जयघोषात सेलू येथील स्वामी विवेकानंद नगरात श्री संत गजानन महाराज प्रकट दिन महोत्सव भक्तीमय वातावरणात उत्साहात पार पडला. रविवारी, ८ फेब्रुवारी रोजी प्रसिद्ध कीर्तनकार भागवताचार्य बाळू महाराज गिरगावकर यांच्या काल्याच्या कीर्तनाने सांगता झाली. दर्शन, कीर्तन आणि महाप्रसादासाठी भाविकांनी मोठी गर्दी केली होती.
श्री संत गजानन महाराज मंदिर संस्थानच्या वतीने या महोत्सवाच्या निमित्ताने गेल्या तीन दिवसांपासून विविध धार्मिक कार्यक्रमांचे आयोजन करण्यात आले होते. रविवारी सकाळी भागवताचार्य बाळू महाराज गिरगावकर यांचे कीर्तन झाले. त्यांनी आपल्या रसाळ वाणीतून श्री गजानन महाराजांच्या महतीचे वर्णन केले. तसेच नर्मदा परिक्रमा आणि भारतीय संस्कृतीचे महत्त्व विशद केले. यावेळी नगराध्यक्ष मिलिंद सावंत, नगरसेवक डॉ.अनिकेत जोगदंड, मनीष कदम, मिलिंद पवार, आप्पा आनंदे यांच्यासह विविध क्षेत्रातील मान्यवरांची उपस्थिती होती. संस्थानतर्फे मान्यवरांचा सत्कार करण्यात आला. कीर्तनानंतर दुपारी भाविकांनी शिस्तबद्ध पद्धतीने महाप्रसाद घेतला. सकाळपासून सायंकाळीही दर्शनासाठी भक्तांची रीघ लागली होती. महोत्सवाच्या यशस्वीतेसाठी स्वामी विवेकानंदनगर परिसरातील रहिवासी आणि मंदिर कार्यकारी मंडळांच्या पदाधिकारी, सदस्यांनी तसेच स्वयंसेवकांनी पुढाकार घेतला.
