जुन्याच आदेशानुसार करतो विक्री; पुन्हा गर्दीच्या रांगा
परभणी : परभणी जिल्ह्यातील पेट्रोल आणि डिझेल विक्रीवर लावण्यात आलेले इंधन मर्यादेचे निर्बंध जिल्हा प्रशासनाने तातडीने मागे घेतले आहेत. जिल्हा पुरवठा अधिकारी विलास मुसळे यांनी २६.०३.२०२६ रोजी यासंदर्भातील नवीन आदेश निर्गमित केले आहेत.परंतु पहिल्याच आदेशाला दाखवून सेलूतील रेल्वेस्थानकाजवळील पंपचालकाने हुशारीने विक्री सुरू केली आहे. परिणामी अफवा निवळल्या, तरी पुन्हा रांगा, गर्दी वाढत चालली आहे. कहर म्हणजे हा पंपमालक बोलतो चांगली मराठी, पण कळतं त्याला इंग्रजी…सरकारी अधिकाऱ्यांनी त्याला फोन केला, तरच आदेश पाळतो, असे त्याच्या बोलण्यात दिसून आले. लेखी आदेश त्याला मान्य नाही ? असा प्रश्न उपस्थित होतो. शेवटी त्याची चूक नाही; पण हुश्शारी मात्र कौतुकास्पद आहे. पुन्हा रांगेत या आणि इंधन घ्या, अशी रणनीती त्याने आखली आहे. यामुळे रांगा तिथेच फिरतानाचे चित्र शुक्रवारी, २७ मार्च २०२६ रोजी दुपारी होते.
दरम्यान, परभणी जिल्ह्यात मुबलक इंधन साठा उपलब्ध असून अफवांमुळे कृत्रिम तुटवडा निर्माण झाला आहे. गर्दी मुळे आवक आणि वितरण प्रभावीत झाले आहे. मात्र, आवक नियमित सुरू आहे. लवकरच परिस्थिती पूर्वपदावर येत आहे. इंधन विक्री मर्यादा रद्द करण्यात आली असली तरी, वाहनचालकांनी आवश्यक तेवढेच इंधन घ्यावे. साठेबाजी करणारांवर कडक कारवाई करण्याचा इशारा जिल्हा पुरवठा अधिकारी विलास मुसळे यांनी दिला आहे.
इंधनाचे दर स्थिर राहणार असल्याचेही त्यांनी स्पष्ट केले आहे.
यापूर्वी प्रशासनाने संदर्भीय आदेशान्वये दुचाकी वाहनांसाठी २००/- रुपये आणि तीन चाकी व चार चाकी वाहनांसाठी २०००/- रुपयांपर्यंत इंधन भरण्याची मर्यादा निश्चित केली होती. मात्र, या निर्णयामुळे नागरिकांमध्ये इंधन टंचाईबाबत गैरसमज निर्माण होऊन पेट्रोल पंपांवर अनावश्यक गर्दी वाढली होती. ही परिस्थिती पाहता प्रशासनाने आधीचे निर्बंध तात्काळ प्रभावाने मागे घेण्याचा निर्णय घेतला आहे.जिल्ह्यातील पेट्रोल पंपांवर पेट्रोल व डिझेलचा मुबलक साठा उपलब्ध आहे. त्यामुळे नागरिकांनी कोणत्याही अफवांवर विश्वास ठेवू नये आणि पेट्रोल पंपांवर गर्दी न करता आवश्यकतेनुसारच इंधन भरून घ्यावे, असे आवाहन जिल्हा पुरवठा अधिकाऱ्यांनी केले आहे. दरम्यान, पेट्रोल व डिझेल सुट्टे किंवा खुल्या स्वरूपात (कॅन, बाटली, डबा किंवा इतर कोणत्याही भांड्यात) विक्री न करण्याबाबतचे आदेश मात्र कायम राहणार असल्याचेही प्रशासनाने स्पष्ट केले आहे.
