विद्यार्थ्यांच्या देशभक्तिपर मनोगतातून स्वातंत्र्यदिनाचा उत्साह
वाशिम : येथील सावित्रीबाई फुले नर्सिंग कॉलेजमध्ये १५ ऑगस्ट स्वातंत्र्यदिन उत्साहात साजरा करण्यात आला. कार्यक्रमाला प्रमुख पाहुणे म्हणून गिरधारीलाल सारडा व नागपूरकर हे उपस्थित होते.
कार्यक्रमाच्या सुरवातीला महात्मा गांधी, सावित्रीबाई फुले डॉ. बाबासाहेब आंबेडकर, छत्रपती शिवाजी महाराज यांच्या प्रतिमांचे मान्यवरांच्या हस्ते पूजन करण्यात आले. त्यानंतर प्रमुख पाहुण्यांचा सत्कार करण्यात आला. यावेळी गिरधारीलाल सारडा यांनी विद्यार्थ्यांना स्वातंत्र्याचे महत्त्व समजून घेत देशाच्या प्रगतीत आपले योगदान देण्याचे आवाहन केले. नर्सिंग क्षेत्रातील विद्यार्थ्यांनी शिक्षणासोबत सेवाभाव, शिस्त आणि सामाजिक बांधिलकी जोपासावी, असे त्यांनी सांगितले.डॉ. लायन्स वसंतराव धाडवे यांनी विद्यार्थ्यांना मार्गदर्शन करताना आरोग्यसेवेत कार्यरत असताना रुग्णांप्रती संवेदनशीलता, जबाबदारी आणि मानवतेची भावना कायम ठेवण्याचे आवाहन केले. नर्सिंग क्षेत्र हे केवळ व्यवसाय नसून समाजसेवेचे प्रभावी माध्यम असल्याचे त्यांनी नमूद केले.यावेळी द्वितीय वर्षातील पायल बनसोडे, पल्लवी गिरी, सोनल चव्हाण व ऋतुजा, प्रथम वर्षातील युक्ती चव्हाण, समीक्षा राठोड, ओंकार वानखेडे तसेच तृतीय वर्षातील अंजली इंगळे यांनी स्वातंत्र्यदिनाचे महत्त्व व राष्ट्रभक्तीविषयी मनोगते व्यक्त केली. अझहर सर यांनीही विद्यार्थ्यांना मार्गदर्शन केले.कार्यक्रमाचे सूत्रसंचालन तृतीय वर्षातील धनश्री काळे व मंगल कबले यांनी केले, तर रागिनी इंगोले यांनी आभार प्रदर्शन केले. विद्यार्थ्यांच्या उत्स्फूर्त सहभागामुळे कार्यक्रमाला उत्साहपूर्ण वातावरण लाभले.
