रामबागचा पर्यावरण संदेश; आदर्श व्यापारी मंडळाचा भूत बंगला
सेलू : सेलू शहरातील गणेशोत्सवात यंदा विविध मंडळांनी सामाजिक प्रबोधन आणि थरारक मनोरंजनाची उत्तम सांगड घातली आहे. मारवाडी गल्लीतील श्री बालाजी मंदिर ट्रस्टच्या श्री रामबाग गणेश मंडळाने पर्यावरण संवर्धनाचा प्रभावी संदेश दिला असून, मोंढा भागातील श्री आदर्श व्यापारी गणेश मंडळाने साकारलेला थरारक ‘भूत बंगला’ भाविकांच्या आकर्षणाचा केंद्रबिंदू ठरत आहे.
रामबाग गणेश मंडळाने यंदा ७० वर्षांची परंपरा जपत ‘रामबन जंगल सफारी’ हा जिवंत देखावा साकारला आहे. केवळ धार्मिक विधींपुरते मर्यादित न राहता ‘जंगल नष्ट झाले तर जीवन संपेल’ हा पर्यावरण रक्षणाचा विचार यातून मांडण्यात आला आहे. मंडपात अंधारी गुहा, लटकता पूल, मुसळधार पाऊस, ढगांचा गडगडाट आणि वन्यजीवांचा अनुभव भाविकांना खिळवून ठेवतो. तीन आठवड्यांच्या परिश्रमानंतर साकारलेल्या या सफारीच्या शेवटी ७ फूट उंच गणेशाचे दर्शन घडते. दररोज सायंकाळी ७ ते १० वेळेत शिस्तबद्ध पद्धतीने देखावे दाखविले जात आहेत. दुसरीकडे, शहरातील प्रतिष्ठित श्री आदर्श व्यापारी गणेश मंडळाने मोंढा परिसरातील गांधी पुतळ्यामागे ‘हॉरर कार्निव्हल-२’ अंतर्गत ‘भूत बंगला’ हा थरारक देखावा उभारला आहे. नावीन्यपूर्ण परंपरा जपत सादर केलेल्या या देखाव्यात ‘जे तुम्ही पाहणार नाही, ते अनुभवणार!’ अशी संकल्पना आहे. आत शिरताच जमीन हलल्याचा भास आणि बाहेर पडण्याचा रस्ता शोधताना होणारी उत्सुकता अंगावर काटा आणते. नागरिकांनी कुटुंबासह या दोन्ही आगळ्यावेगळ्या देखाव्यांचा आनंद घेण्यासाठी भाविकांनी गर्दी केली. मंडळाचे पदाधिकारी व जेष्ठ कार्यकर्ते व्यवस्थेवर लक्ष ठेवून होते.
फोटो : सेलूतील मारवाडी गल्लीतील श्री बालाजी मंदिर ट्रस्टच्या श्री रामबाग गणेश मंडळाने देखाव्याद्वारेपर्यावरण संवर्धनाचा प्रभावी संदेश दिला आहे
फोटो : मोंढा भागातील श्री आदर्श व्यापारी गणेश मंडळाने साकारलेला थरारक ‘भूत बंगला’ भाविकांच्या आकर्षणाचा केंद्रबिंदू ठरत आहे.
फोटो :सेलू शहरातील रायगडचा राजा मित्र मंडळाने १८ फुटी उंच श्रीबालगणेशाची भव्य मूर्ती गणेश भक्तांची आकर्षण ठरली.
फुलारी गल्लीत महाकाल गणेश मंडळाची १५ फुटी उंच मूर्ती लक्षवेधी ठरली आहे.
