सेलू-वालूर रस्त्यावरील घटना; पाच जणांना गंभीर दुखापती
सेलू जि.परभणी : सेलू-वालूर रस्त्यावरील आलम शहा दर्ग्याजवळ मंगळवारी १० फेब्रुवारी रोजी सकाळी दहाच्या सुमारास क्रुझर गाडीचा (क्रमांक एमएच १३ एझेड ३०२६) भीषण अपघात झाला. या अपघातात १३ जण जखमी झाले असून ५ ते ६ जणांना गंभीर दुखापत झाल्याची माहिती उपजिल्हा रुग्णालयातून मिळाली आहे.
जिंतूर तालुक्यातील ढोणे दहेगाव येथील वऱ्हाडी मंडळी क्रुझर गाडीने वालूर मार्गे सेलू तालुक्यातील खवणे पिंपरी येथे एका लग्न सोहळ्यासाठी जात होती. वालूर शिवारात चालकाचे नियंत्रण सुटल्याने हा अपघात झाला. अपघातातील जखमींना तातडीने सेलू येथील उपजिल्हा रुग्णालयात दाखल करण्यात आले. तिथे प्राथमिक उपचार केल्यानंतर सर्वांना पुढील उपचारासाठी परभणी येथे हलवण्यात आले असल्याची माहिती वैद्यकीय अधीक्षक डॉ. संजय हरबडे यांनी दिली.या अपघातात परमेश्वर जाधव, ज्ञानबा वाकडे, मधुकर ढोणे, अशोक अण्णासाहेब, भाऊसाहेब ढोणे, ज्ञानेश्वर पवार, विठ्ठल ढोणे, मधुकर ढोणे, नागेश गोडगे, पांडुरंग ढोणे, ज्ञानेश्वर वाकडे आणि परमेश्वर ढोणे हे प्रवासी जखमी झाले आहेत.घटनेची माहिती मिळताच उपविभागीय पोलीस अधिकारी दीपककुमार वाघमारे, पोलीस निरीक्षक दीपक बोरसे, पोलीस उपनिरीक्षक गणेश पवार, जमादार गुलाब राठोड व पोलीस कर्मचाऱ्यांनी अपघात स्थळी भेट देऊन पाहणी केली. दरम्यान, या अपघाताबाबत रात्री उशिरापर्यंत सेलू पोलीस ठाण्यात कोणतीही नोंद झाली नसल्याचे पोलिसांनी सांगितले.
