परभणीत काँग्रेसला मोठे खिंडार, शेकडो समर्थकांसह प्रवेश
परभणी : परभणी जिल्ह्याच्या राजकारणात मंगळवार, २९ जुलै रोजी मोठा राजकीय भूकंप झाला. काँग्रेसचे ज्येष्ठ नेते, माजी मंत्री आणि जिल्हा काँग्रेस कमिटीचे विद्यमान अध्यक्ष सुरेश वरपुडकर, त्यांचे सुपुत्र व जिल्हा परिषदेचे माजी उपाध्यक्ष समशेर वरपुडकर आणि स्नुषा प्रेरणा वरपुडकर यांनी शेकडो समर्थकांसह भारतीय जनता पार्टीत प्रवेश केला.
मुंबई येथील भाजप प्रदेश कार्यालयात झालेल्या या पक्षप्रवेश सोहळ्याला महसूल मंत्री चंद्रशेखर बावनकुळे, प्रदेशाध्यक्ष रवींद्र चव्हाण, मंत्री अतुल सावे आणि परभणी जिल्ह्याच्या पालकमंत्री मेघना साकोरे-बोर्डीकर यांच्यासह अनेक भाजप नेत्यांची उपस्थिती होती. वरपुडकर कुटुंबीयांसह जिल्हा परिषदेचे माजी सभापती, सदस्य, पंचायत समितीचे माजी सभापती, उपसभापती, बाजार समितीचे पदाधिकारी आणि काँग्रेसचे तालुकाध्यक्ष अशा शेकडो पदाधिकाऱ्यांनी भाजपमध्ये प्रवेश केला. यात धोंडीराम चव्हाण, देविदास मुलगीर, तुळशीराम सामाले, द्वारकाबाई कांबळे, टी.एम. देशमुख, तुकाराम वाघ, बाळासाहेब रसाळ, शिवाजीराव बेले, संतोष सावंत, रामेश्वर खटिंग, दिलीपराव देशमुख, अजय चव्हाण, प्रमोदराव भोसले, रमेशराव देशमुख, घनश्याम कनके, मुंजाजीराव जवंजाळ, माऊली झाडे, दिलीपराव साळवे, मधुकर लाड, श्रीकृष्ण भोसले, अनिल धोंडगे, बाबासाहेब आवचार, श्रीधरराव देशमुख, प्रणित खजे, सचिन अंबिलवादे, रंगनाथराव भोसले आदींचा समावेश होता. या पक्षप्रवेशामुळे आगामी स्थानिक स्वराज्य संस्था निवडणुकांच्या पार्श्वभूमीवर परभणी जिल्ह्यात काँग्रेस पक्षाला मोठे खिंडार पडले आहे.
