पारंपरिक पद्धतीने नागपंचमी साजरी
सेलू : सेलू तालुक्यातील डिग्रस जहांगीर येथील प्राचीन श्री विठोजी बिरोजी मंदिरात मंगळवारी नागपंचमी उत्सव पारंपरिक पद्धतीने उत्साहात साजरा करण्यात आला. दर्शनासाठी पंचक्रोशीतील शेकडो भाविकांनी सकाळी सात वाजल्यापासून गर्दी केली होती. मंदिर परिसरातील माती (वावरी) घरात ठेवल्याने साप येत नाहीत, अशी अख्यायिका आहे. त्यामुळे मूठभर माती घरी घेऊन जाण्यासाठी भाविकांची झुंबड उडाली होती.
वजनी दगडी गोल गोटे उचलण्याची परंपरा या वर्षीही भाविकांनी जपली. छोटेखानी यात्रेमध्ये प्रसाद व खेळणीची दुकाने मोठ्या प्रमाणावर थाटण्यात आली होती. नारळाची विक्री विक्रमी झाली. शिस्तबद्ध दर्शनासाठी गावातील दीडशेहुन अधिक तरूण व ग्रामस्थांनी स्वयंसेवक म्हणून सेवा दिली. खिचडी प्रसादाचे नियोजन ग्रामस्थांनी केले होते. पोलिस प्रशासनाने चोख बंदोबस्त ठेवला होता.
