सेलूतील स्वामी रामानंद तीर्थ ग्रंथालयात कार्यक्रम
सेलू : साने गुरुजी लिखित श्यामची आई’ हे पुस्तक केवळ बालकांसाठीच नव्हे, तर सर्वांना योग्य दिशा देणारे आणि सुसंस्कारित करणारे आहे. हे पुस्तक केवळ एक साहित्यकृती नसून आईच्या रूपात आपल्या सर्वांच्या मनावर संस्कार करणारे आणि समाजात कसे वागावे, हे शिकवणारे माध्यम आहे, ‘श्यामची आई’ संस्कारक्षम पिढी घडविण्यात मोलाचे योगदान देत आहे, असे प्रतिपादन न्यू हायस्कूल प्रशालेतील सहशिक्षिका मंजुषा बोराडे यांनी केले.
सेलू येथील स्वामी रामानंद तीर्थ हिंदी-मराठी ग्रंथालयाच्या वतीने आयोजित एक दिवस एक पुस्तक या उपक्रमांतर्गत ३५ वे पुष्प मंगळवारी ग्रंथालयाच्या वाचन कक्षात गुंफण्यात आले.यावेळी पुढे बोलताना मंजुषा बोराडे यांनी श्यामची आई पुस्तकातील साने गुरुजींच्या मातृहृदयाचे भावविश्व श्रोत्यांपुढे मांडले. आजच्या काळात मुलांना संस्कारक्षम घडवण्यासाठी प्रत्येक मातेने या पुस्तकाचे वाचन करणे अत्यंत आवश्यक असल्याचे त्यांनी आवर्जून सांगितले.
कार्यक्रमाच्या अध्यक्षीय समारोप प्रसंगी मधुकर काष्टे म्हणाले की, आपण सर्वजण साने गुरुजींच्या संस्कारांनी प्रभावित झाल्यामुळे येथे एकत्र आलो आहोत. मातृत्व आणि मातृहृदयाचे वर्णन मानवी हृदयाला स्पर्श करून जाते. हे पुस्तक म्हणजे सुसंस्कारित मुले घडवणारी एक शाळाच आहे. ज्या विद्यार्थ्यांनी या पुस्तकाचे वाचन केले आहे, त्यांचे व्यक्तिमत्त्व इतरांपेक्षा वेगळे आणि प्रगल्भ पाहावयास मिळते.
या कार्यक्रमात विविध क्षेत्रातील मान्यवरांचा सत्कार करण्यात आला. यामध्ये संमेलनातील कवी म्हणून सहभागी झालेले गौतम सूर्यवंशी, वक्तृत्व स्पर्धेतील यशाबद्दल डॉ. सुरेश हिवाळे आणि रांगोळी स्पर्धेत प्रथम क्रमांक पटकावल्याबद्दल पांडुरंग पाटणकर यांचा मान्यवरांच्या हस्ते गौरव करण्यात आला.कार्यक्रमाचे प्रास्ताविक डॉ. सुरेश हिवाळे यांनी केले, सूत्रसंचालन आम्रपाली खाजेकर यांनी तर आभार प्रदर्शन पांडुरंग पाटणकर यांनी मानले. या प्रसंगी ग्रंथालयाचे उपाध्यक्ष प्राचार्य डॉ. शरद कुलकर्णी, सचिव चंद्रशेखर मुळावेकर, दत्तात्रय माकोडे, एन. एम. देशपांडे, रवी मुळावेकर, गंगाधर गुंजकर, श्रीपाद कुलकर्णी, नारायण पाटील, मधुकर वाकडीकर, दत्तात्रय आंधळे, आनंद देशमुख, रेखा आर्वीकर, शुभदा गोळेगावकर, वंदना कुलकर्णी, बालाजी बुधवंत, शिवाजी बोचरे, विजय बोचरे, शेख मौजम आदींची उपस्थिती होती.
