पालकमंत्री मेघना साकोरे-बोर्डीकर यांच्यासह मान्यवरांची उपस्थिती, नवनिर्वाचित नगरसेवकांचाही सत्कार
सेलू | प्रतिनिधी : सेलू नगरपालिकेचे नवनिर्वाचित नगराध्यक्ष मिलिंद चंद्रकला ज्ञानदेव सावंत यांचा पदग्रहण समारंभ आणि नवनिर्वाचित नगरसेवकांचा सत्कार सोहळा राज्यमंत्री तथा परभणी जिल्ह्याच्या पालकमंत्री मेघना साकोरे-बोर्डीकर आणि मान्यवरांच्या उपस्थितीत शुक्रवारी, २ जानेवारी २०२६ रोजी मोठ्या थाटात पार पडला. या सोहळ्याला राजकीय क्षेत्रातील दिग्गज नेत्यांसह प्रशासकीय अधिकारी आणि नागरिकांची मोठी उपस्थिती होती.या सोहळ्याप्रसंगी राज्यमंत्री तथा परभणी जिल्ह्याच्या पालकमंत्री मेघना साकोरे-बोर्डीकर यांनी उपस्थित राहून नवनिर्वाचित नगराध्यक्ष आणि नगरसेवकांना शुभेच्छा दिल्या. व्यासपीठावर माजी नगराध्यक्ष विनोद बोराडे, बाजार समितीचे माजी सभापती दिनकर वाघ, सेलू तालुका खरेदी विक्री संघाचे चेअरमन मुकेश बोराडे, बाजार समितीचे सभापती डॉ. संजय रोडगे, जिल्हा परिषदेचे माजी सभापती अशोक काकडे आणि प्रभाकर वाघीकर यांची प्रमुख उपस्थिती होती. तसेच भाजपचे सेलू तालुकाध्यक्ष गणेश काटकर, शहराध्यक्ष अशोक शेलार, भाजप गटनेते साईराज बोराडे व भाजपचे नवनिर्वाचित १४ नगरसेवक या कार्यक्रमाला उपस्थित होते.कार्यक्रमादरम्यान पालकमंत्री मेघना साकोरे-बोर्डीकर, नगरपालिकेचे मुख्याधिकारी तुकाराम कदम, उप मुख्याधिकारी बी. एस. चव्हाण आणि नगरपालिका कर्मचाऱ्यांनी नवनिर्वाचित अध्यक्ष व सर्व सदस्यांचा यथोचित सत्कार केला. यावेळी बोलताना मान्यवरांनी सेलू शहराच्या सर्वांगीण प्रगतीसाठी आणि नागरी समस्या सोडवण्यासाठी सर्व घटकांना सोबत घेऊन काम करण्याचा निर्धार व्यक्त केला. या पदग्रहण सोहळ्याला शहरातील विविध स्तरातील लोकप्रतिनिधी, पदाधिकारी, कार्यकर्ते आणि नागरिक मोठ्या संख्येने उपस्थित होते.
