परभणी येथील आई महोत्सवात होणार गौरव; पतीच्या निधनानंतर संघर्षातून घडवले मुलांचे भविष्य
सेलू जि.परभणी : मानव सेवा विकास प्रतिष्ठानच्या वतीने देण्यात येणारा यंदाचा कर्तृत्ववान माता सन्मान पुरस्कार सेलू येथील सुरेखा आहेरकर-पाटवकर यांना जाहीर झाला आहे. परभणी येथे २१ ते २३ जानेवारी २०२६ या कालावधीत आयोजित ‘आई महोत्सवा’मध्ये हा सन्मान प्रदान करण्यात येणार आहे.
आहेर बोरगाव येथील नितीन माध्यमिक विद्यालयात सहशिक्षिका म्हणून कार्यरत असलेल्या सुरेखा आहेरकर यांचा जीवनप्रवास अत्यंत संघर्षाचा आणि प्रेरणादायी राहिला आहे. अवघ्या दहावीत असताना विवाह झाल्यानंतर त्यांनी जिद्दीने बारावी आणि डी.एड. पर्यंतचे शिक्षण पूर्ण केले. मात्र, मुले लहान असतानाच पतीचे निधन झाल्याने त्यांच्यावर दुःखाचा डोंगर कोसळला. अशा परिस्थितीतही खचून न जाता त्यांनी यशवंतराव चव्हाण महाराष्ट्र मुक्त विद्यापीठातून बी.ए., एम.ए. (मराठी व अर्थशास्त्र) आणि मुख्याध्यापक व्यवस्थापन पदविका पूर्ण केली. सध्या त्या बी.एड.चे शिक्षण घेत आहेत.
स्वतःच्या शिक्षणासोबतच त्यांनी आपल्या मुलांच्या उच्च शिक्षणाकडेही विशेष लक्ष दिले. त्यांचा मुलगा परेश हा पुणे येथील बी.जे. मेडिकल कॉलेजमध्ये एम.बी.बी.एस. करत असून, कन्या प्रतीक्षा हिने फॅशन डिझाइनमध्ये पदव्युत्तर शिक्षण पूर्ण केले आहे. प्रतीक्षा ही नांदेड विद्यापीठाची सुवर्णपदक विजेती असून तिने मेकअप आर्टिस्ट व नाट्यकलावंत म्हणून नावलौकिक मिळवला आहे. अध्यापन कार्यासोबतच सुरेखा आहेरकर यांनी सामाजिक बांधिलकी जपत दररोज सकाळी दोन तास अतिरिक्त तासिका घेऊन अनेक विद्यार्थ्यांना नवोदय व शिष्यवृत्ती परीक्षेत यश मिळवून दिले आहे.
पुरस्काराबद्दल संस्थेचे अध्यक्ष राजेंद्र लहाने, मुख्याध्यापक सर्जेराव लहाने, रामराव बोबडे, रामराव गायकवाड, वसंतराव डासाळकर, डॉ. शरद ठाकर, प्रा. ज्ञानेश्वर सोळंके, गंगाधर अवचार आदींसह विविध स्तरांतून त्यांचे अभिनंदन होत आहे.
