सेलूत राज्यस्तरीय क्रिकेट स्पर्धेचे आयोजन
सेलू : सेलू येथील नूतन महाविद्यालय क्रीडांगणावर हिंदुहृदयसम्राट बाळासाहेब ठाकरे यांची जयंती उत्साहात साजरी करण्यात आली. नितीन कला, क्रीडा व सांस्कृतिक मंडळाच्या वतीने आयोजित या कार्यक्रमात शिवसेना तालुका प्रमुख तथा गटनेते संदीप लहाने यांनी बाळासाहेबांच्या प्रतिमेस पुष्पहार अर्पण करून अभिवादन केले. यावेळी माजी नगरसेवक अविनाश शेरे, पांडुरंग कावळे, गजानन शेलार, अजय काष्टे, राईस शेख, सुरज शिंदे, कपिल दायमा, झिशान सिद्धीकी आणि सलमान सिद्धीकी यांसह अनेक पदाधिकाऱ्यांनी बाळासाहेबांच्या स्मृतींना उजाळा दिला.
बाळासाहेबांच्या जयंतीचे औचित्य साधून मंडळाने २६ व्या वर्षात पदार्पण करणाऱ्या निमंत्रितांच्या राज्यस्तरीय क्रिकेट स्पर्धेचे आयोजन केले आहे. या स्पर्धेचे उद्घाटन शनिवार, २४ जानेवारी २०२६ रोजी सकाळी १०:३० वाजता शिवसेना उपनेते आनंद जाधव यांच्या हस्ते होणार आहे. अध्यक्षस्थानी माजी आमदार हरिभाऊ लहाने हे असून प्रमुख पाहुणे म्हणून जिल्हाप्रमुख आनंद भरोसे व राजू कापसे उपस्थित राहणार आहेत. १ फेब्रुवारीपर्यंत चालणार्‍या क्रिकेट स्पर्धांचा क्रीडा प्रेमींनी आनंद घ्यावा, असे आवाहन माजी आमदार हरिभाऊ लहाने आणि आयोजक संदीप लहाने केले आहे.
