पालम तालुक्यातील गुळखंड येथील जय भवानी वाचनालयाकडून १९ फेब्रुवारी रोजी गौरव
परभणी : सेलू येथील स्वामी रामानंद तीर्थ हिंदी मराठी ग्रंथालयाचे ग्रंथपाल महादेव माणिकराव आगजाळ यांना सन २०२४-२५; तसेच बोरी (ता.जिंतूर) येथील जयकुमारजी जैन सार्वजनिक वाचनालयाचे ग्रंथपाल नेमिनाथ जयकुमारजी जैन यांना सन २०२५-२६ या वर्षीचा परभणी जिल्हास्तरीय उत्कृष्ट ग्रंथपाल पुरस्कार जाहीर करण्यात आला आहे.
गुळखंड (ता.पालम) येथील जय भवानी सार्वजनिक वाचनालयाच्या वतीने दरवर्षी दिला जाणारा हा प्रतिष्ठेचा पुरस्कार त्यांच्या वाचन संस्कृतीतील योगदानासाठी प्रदान करण्यात येणार आहे. या पुरस्काराचे वितरण गुरुवार, १९ फेब्रुवारी २०२६ रोजी सकाळी ९:०० वाजता एका विशेष कार्यक्रमात केले जाणार आहे, असे ग्रंथालयाचे अध्यक्ष बापूसाहेब पौळ आणि सचिव पुष्पावती पौळ यांनी १६ फेब्रुवारी रोजी पत्राद्वारे कळविले आहे.
महादेव आगजाळ यांनी सेलू येथील ग्रंथालयाच्या माध्यमातून वाचन चळवळ जिवंत ठेवण्यासाठी सातत्याने अनेक नाविन्यपूर्ण उपक्रम राबवले आहेत. उत्तम संघटक आणि रोखठोक व्यक्तिमत्त्व म्हणून परिचित असलेल्या आगजाळ यांनी केवळ पुस्तके जतन न करता ती वाचकांपर्यंत पोहोचवण्यासाठी मोठे कष्ट घेतले आहेत. त्यांच्या या कार्याची दखल घेऊन पुरस्कारासाठी निवड करण्यात आली आहे.
नेमिनाथ जैन यांनी ग्रंथालय क्षेत्राच्या माध्यमातून वाचन संस्कृती टिकवण्यासाठी आणि ती वाचकांपर्यंत पोहोचवण्यासाठी मोलाचे योगदान दिले आहे. त्यांच्या या कार्याची दखल घेऊन पुरस्कारासाठी निवड करण्यात आली आहे. परभणी जिल्ह्यातील ग्रंथालय क्षेत्रात तसेच विविध सामाजिक, शैक्षणिक क्षेत्रात कार्यरत असलेल्या विविध संस्था आणि वाचक प्रेमींनी या दोन्ही ग्रंथपालांच्या निवडीचे स्वागत केले असून त्यांच्या पुढील वाटचालीस शुभेच्छा दिल्या आहेत.
