नगरभोजनात शेकडो भाविकांनी घेतला महाप्रसाद
परभणी : जिल्ह्यात “जय श्रीराम” च्या जयघोषात मिरवणुकांसह विविध कार्यक्रमांनी गुरुवारी, २६ मार्च रोजी राम जन्मोत्सव उत्साहात साजरा करण्यात आला. भाविकांनी ठिकाणी ठिकाणच्या मंदिरात दर्शनासाठी तसेच महाप्रसादासाठी गर्दी केली होती.
मानवत येथील पुरातन राम मंदिर, वझूर ( ता.पूर्णा) येथील हेमाडपंती श्री रामेश्वर मंदिर, पूर्णा व सेलू येथील जुने राम मंदिर यांसह जिल्ह्यातील विविध मंदिरात राम जन्मोत्सव सोहळा उत्साहात साजरा करण्यात आला. सेलू येथील ग्रामदैवत श्री केशवराज बाबासाहेब महाराजांचे शिष्य श्री साईबाबा यांच्या मंदिरात आयोजित श्री साई महोत्सवाची सांगता गुरुवारी सकाळी १० वाजता शिवाजी महाराज खवणे यांचे काल्याच्या कीर्तनाने झाली.यानिमित्ताने २४ व्या वर्षी नगरभोजनाची परंपरा जपण्यात आली. जन्मोत्सव, महाआरती तसेच महाप्रसादासाठी (नगरभोजन) भाविकांनी गर्दी केली होती. यावेळी विविध क्षेत्रातील मान्यवर उपस्थित होते. दरम्यान, यावर्षीही नगरभोजनासाठी सेलू शहरातील महिला भाविकांनी घरून पोळ्या तयार करून देत मोठा सहभाग नोंदविला. याबद्दल साईधामच्या वतीने आभार मानण्यात आले. अत्यंत शिस्तबद्ध पद्धतीने भाविकांनी महाप्रसाद घेतला. स्वयंसेवक भाविकांनी पुढाकार घेतला.
