भाविकांची मोठी उपस्थिती
रांजणी : घनसावंगी तालुक्यातील रांजणी येथील प्राचीन श्रीराम मंदिरात गुरुवारी श्रीराम जन्मोत्सव सोहळा अत्यंत उत्साही वातावरणात साजरा करण्यात आला. दुपारी ठीक १२ वाजता प्रभू श्रीरामांचा जन्मोत्सव होताच भाविकांनी गुलाल आणि फुलांची उधळण केली. यावेळी संपूर्ण मंदिर परिसर श्रीराम नामाच्या जयघोषाने दुमदुमून गेला होता.
या मंगल प्रसंगी प्रभू श्रीरामाचा पाळणा म्हणण्यात आला. उत्सवाचे औचित्य साधून ग्राम पुरोहित विनोद गुरु यांनी राम विजय ग्रंथाचे पारायण केले, तर रामभक्त आनंद झंवर यांच्या हस्ते श्रीरामांचे विधिवत पूजन करण्यात आले.जन्मोत्सवानंतर उपस्थित सर्व भाविकांसाठी महाप्रसादाचे आयोजन करण्यात आले होते. या धार्मिक सोहळ्यासाठी गावातील अबालवृद्धांसह मोठ्या संख्येने भाविक भक्त उपस्थित होते.
