पोलिसांची गस्त सुरू असतानाच चोरी; फिंगरप्रिंट तज्ज्ञ आणि डॉग स्क्वॉड पाचारण
पालम : शहरात चोरट्यांनी एकाच रात्री तीन ठिकाणी दुकाने फोडून धुमाकूळ घातल्याने व्यापाऱ्यांमध्ये भीतीचे वातावरण निर्माण झाले आहे. पोलिसांची गस्त सुरू असतानाही चोरट्यांनी मोठ्या शिताफीने चोरी केल्याने पोलीस यंत्रणेसमोर मोठे आव्हान उभे राहिले आहे.
गंगाखेड रोडवरील मयुरी बार येथे मध्यरात्री सुमारे ३ ते ३:१५ वाजण्याच्या सुमारास चोरट्यांनी बारच्या पाठीमागील शटर व खिडकी वाकवून आत प्रवेश केला. चोरट्यांनी तेथून काही रोख रक्कम व सुमारे दोन हजार रुपयांची दारू लंपास केली. या घटनेचे सीसीटीव्ही फुटेज समोर आले असून, त्यामध्ये चेहऱ्यावर रुमाल बांधलेले दोन चोरटे चोरी करताना स्पष्ट दिसत आहेत. मयुरी बारचे मालक झोटींग पाटील यांना चोरीची घटना मोबाईलवर कळताच त्यांनी पालम पोलीस ठाण्याचे पोलीस निरीक्षक आदित्य लोणीकर यांच्याशी संपर्क साधला. माहिती मिळाल्यानंतर अवघ्या पाच मिनिटांत पोलीस निरीक्षक आदित्य लोणीकर घटनास्थळी दाखल झाले, तोपर्यंत चोरटे पसार झाले होते.याच रात्री तहसील कार्यालयासमोरील आवारातील विशाल भोसले यांच्या भोसले मल्टीसर्विसेस या दुकानाचे शटर वाकवून चोरट्यांनी आत प्रवेश केला व तेथील गल्ल्यातील रोख रक्कम चोरून नेली. तिसऱ्या घटनेत लोहा रोडवरील एका देशी दारू दुकानाचे शटर वाकवून मध्यरात्री अंदाजे २ ते ३ वाजेदरम्यान चोरट्यांनी दुकानातील रोख रक्कम आणि देशी दारूच्या बाटल्या लंपास केल्या. रात्रभर पोलिसांची गस्त सुरू असतानाही चोरट्यांनी केलेल्या या धाडसी कृत्यामुळे नागरिकांमध्ये चिंतेचे वातावरण आहे. दरम्यान, चोरीचा छडा लावण्यासाठी घटनास्थळी फिंगरप्रिंट तज्ज्ञ आणि डॉग स्क्वॉड पाचारण करण्यात आले असून, पालम पोलीस चोरट्यांचा कसून शोध घेत आहेत.
