प्रॉस्परस पब्लिक स्कूलमध्ये ‘नशामुक्त महाराष्ट्र’ अभियानांतर्गत शपथ ग्रहण
सेलू : श्रीराम प्रतिष्ठान संचलित प्रॉस्परस पब्लिक स्कूल, सेलू येथे ‘नशामुक्त महाराष्ट्र’ अभियानांतर्गत शनिवारी, ८ ऑगस्ट २०२६ रोजी विद्यार्थी व शिक्षकांनी नशामुक्तीची शपथ घेतली. ब्रह्माकुमारी राधा बहेन यांनी ही शपथ दिली. या वेळी राधा बहेन यांनी विद्यार्थ्यांना विविध विषयांवर मार्गदर्शन केले. नशा ही केवळ तंबाखू किंवा गुटख्याची नसून जास्त वेळ मोबाईल वापरणे हीसुद्धा एक नशाच आहे, असा इशारा त्यांनी दिला.
या प्रसंगी श्रीराम प्रतिष्ठानचे अध्यक्ष डॉ. संजय रोडगे, संचालक, मुख्याध्यापक जाधव व उपमुख्याध्यापिका ताठे यांच्यासह सर्व शिक्षकवृंद उपस्थित होते. या कार्यक्रमांतर्गत प्रजापिता ब्रह्माकुमारी ईश्वरीय विश्वविद्यालयाच्या ब्रह्माकुमारी राधा बहेन व श्री. तांबे यांच्या प्रमुख उपस्थितीत ‘संस्कार काळाची गरज व नशामुक्ती महाअभियान’ हा उपक्रम राबवण्यात आला. राधा बहेन यांनी विविध प्रकारच्या व्यसनांमुळे शरीरावर होणारे घातक परिणाम आणि उद्भवणारे आजार यांविषयी माहिती देऊन, या व्यसनांमधून बाहेर कसे पडावे व कोणत्याही प्रकारच्या नशेपासून दूर कसे राहावे, याविषयी त्यांनी विद्यार्थ्यांना मौलिक मार्गदर्शन केले.
