वाशिममधील पिंपरकर परिवाराच्या वैद्यकीय वारशाचा टाइम्स ऑफ इंडिया ग्रुपकडून गौरव
वाशिम ( फुलचंद भगत) : आठ दशकांचा वारसा आणि तीन पिढ्यांची समृद्ध परंपरा असलेल्या पिंपरकर परिवाराला देशातील अग्रगण्य अशा टाइम्स ऑफ इंडिया परिवाराने ‘हेल्थकेअर लीडर’ या सन्मानाने गौरान्वित केले आहे.पिंपरकर परिवारातील तिसऱ्या पिढीचे डॉ. जयंत पिंपरकर आणि त्यांच्या सुविद्य पत्नी डॉ. सौ. एकता पिंपरकर यांनी सुप्रसिद्ध अभिनेत्री ईशा कोप्पीकर आणि पद्मश्री डॉ. विकास महात्मे यांच्या हस्ते ‘हेल्थकेअर लीडर’ हा टाइम्स ऑफ इंडिया ग्रुपचा पुरस्कार स्वीकारला.
पिंपरकर परिवार आणि आयुर्वेद, तसेच पिंपरकर परिवार आणि रुग्णसेवा या एकाच नाण्याच्या दोन बाजू आहेत. पिंपरकर परिवाराने आयुर्वेदाला स्वातंत्र्यपूर्व काळापासून आपलेसे केले आहे. ‘आयुर्वेद रत्न’ असलेले डॉ. गंगाधरराव पिंपरकर हे या परिवाराचे कुलगुरू. १९४० पासून म्हणजेच अगदी स्वातंत्र्यपूर्व काळापासून त्यांनी मालेगाव येथून आयुर्वेद सेवेला सुरुवात केली होती. हाच वारसा त्यांचे सुपुत्र डॉ. चंद्रशेखर गंगाधरराव पिंपरकर यांनी १९६५ पासून पुढे चालवला. वंध्यत्व, पक्षाघात, ज्वर यांवरील हमखास उपचारांसाठी त्यांची केवळ पंचक्रोशीतच नव्हे, तर राज्याच्या राजधानीपर्यंत ख्याती होती.
डोंबिवलीपासून रुग्ण त्यांच्याकडे उपचारासाठी येत असत.हाच वारसा तिसऱ्या पिढीतील डॉ. जयंत चंद्रशेखर पिंपरकर यांनी २००० पासून पुढे नेला. मात्र, त्यांनी आपले आजोबा आणि वडिलांचे कार्यक्षेत्र न निवडता मंगरूळपीर हे शहर रुग्णसेवेसाठी निवडले. वारसा तोच, चिकित्सा पद्धती तीच; पण त्याला त्यांनी अत्याधुनिकतेची जोड दिली. यात त्यांना सुविद्य पत्नी डॉ. सौ. एकता यांची मोलाची साथ मिळाली. आज ‘पिंपरकर हॉस्पिटल, मंगरूळपीर’ केवळ मंगरूळपीर तालुक्यातच नव्हे, तर संपूर्ण जिल्ह्यात आपले वेगळे अस्तित्व राखून कार्यरत आहे.आता या परिवाराला चौथ्या पिढीची प्रतीक्षा आहे. डॉ. जयंत आणि डॉ. एकता पिंपरकर यांचे सुपुत्र अथर्व हे एमबीबीएसच्या शेवटच्या वर्षाला शिकत आहेत. त्यामुळे पिंपरकर परिवाराचा रुग्णसेवेचा हा वैद्यकीय वारसा इथेच थांबणार नाही, तर आजपर्यंत हितचिंतक, मित्रपरिवार आणि रुग्णांनी दाखवलेल्या विश्वासाच्या बळावर तो असाच अविरतपणे सुरू राहील, असा विश्वास या वेळी डॉ. पिंपरकर यांनी व्यक्त केला.
