माजी राज्यमंत्री सुभाषराव ठाकरे यांच्या शुभहस्ते होणार कार्यक्रम; शैक्षणिक संकुलात विविध मान्यवरांची उपस्थिती
वाशिम : भारताच्या स्वातंत्र्य दिनानिमित्त मंगरुळपीर शहरात शनिवार, दि. १५ ऑगस्ट २०२६ रोजी सकाळी ८.२० वाजता ध्वजारोहण व ध्वजवंदनाचा कार्यक्रम आयोजित करण्यात आला आहे. यशवंतराव चव्हाण शैक्षणिक संकुल, वाशिम रोड, मंगरुळपीर येथे हा सोहळा उत्साहात पार पडणार आहे. सुभाषराव ठाकरे (माजी राज्यमंत्री म. राज्य) यांच्या शुभहस्ते ध्वजारोहण व ध्वजवंदन करण्यात येणार असून, श्री. मोतीरामजी ठाकरे, अध्यक्ष, शिक्षण प्रसारक मंडळ, कासोळा यांच्या अध्यक्षतेखाली कार्यक्रमाचे आयोजन करण्यात आले आहे.
स्वातंत्र्य दिनाच्या या राष्ट्रीय कार्यक्रमात विविध शैक्षणिक संस्थांचे प्राचार्य, मुख्याध्यापक, शिक्षक, विद्यार्थी तसेच शिक्षण क्षेत्रातील मान्यवर उपस्थित राहणार आहेत. यामध्ये यशवंतराव चव्हाण कला व विज्ञान महाविद्यालय, यशवंतराव चव्हाण शारीरिक शिक्षण महाविद्यालय, यशवंतराव चव्हाण शिक्षण महाविद्यालय, यशवंतराव चव्हाण अध्यापक विद्यालय, यशवंतराव चव्हाण हायस्कूल व यशवंतराव चव्हाण सी.बी.एस.ई. स्कूल यांचा सहभाग राहणार आहे.स्वातंत्र्य दिन हा देशाच्या स्वातंत्र्यलढ्यातील शूरवीरांच्या त्यागाचे स्मरण करून देणारा दिवस असल्याने या कार्यक्रमाला विशेष महत्त्व आहे. राष्ट्रध्वजाला मानवंदना देत देशभक्तीचा जागर करण्यात येणार असून, विद्यार्थी व नागरिकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजकांकडून करण्यात आले आहे.
