वाशिम : मंगरूळपीर तालुक्यातील नवोपक्रमशील शाळा म्हणून प्रसिद्ध असलेल्या जिल्हा परिषद शाळा पोटी येथे नुकतीच जिल्हा परिषद वाशिम चे मुख्य कार्यकारी अधिकारी अर्पित चव्हाण यांनी भेट देऊन विद्यार्थ्यांची गुणवत्ता, शालेय व्यवस्थापन, भौतिक सुविधा व इतर बाबींची पाहणी केली असता शाळेची गुणवत्ता, बालस्नेही परिसर, व्यवस्थापन याबाबत समाधान व्यक्त केले.
यावेळेस केंद्रप्रमुख रवी ठाकरे, शाळा व्यवस्थापन समितीचे अध्यक्ष राजेश गावंडे, माजी अध्यक्ष अनिल सूर्यवंशी, ग्राम पंचायत पदाधिकारी सतीश दोड, विनोद मनवर व पालक प्रतिनिधी उपस्थित होते. भेटी दरम्यान मुलभेट प्रपत्रानुसार विद्यार्थ्यांच्या गुणवत्तेची पडताळणी करून निपुण अध्ययन स्तराचा आढावा घेण्यात आला.शाळा व्यवस्थापन समितीच्या बैठका, शालेय आरोग्य तपासणी व संदर्भित केलेल्या विद्यार्थ्यांची माहिती घेतली. यावेळी शाळेचे मुख्याध्यापक शरद सुरसे व केंद्रप्रमुख रवी ठाकरे यांनी मधुकर केचे लिखित श्रीसंत गाडगे महाराज हे पुस्तक भेट देऊन त्यांचे व जिल्हा आरोग्य अधिकारी यांचे स्वागत केले. एकंदरीत विद्यार्थ्यांच्या गुणवत्तेबाबत , पोटी शाळेबद्दल समाधान व्यक्त करण्यात आले.
