अंतिम मतदार यादी ४ नोव्हेंबर रोजी होणार प्रसिद्ध; नवीन मतदारांना नाव नोंदणीची संधी

महाराष्ट्रातील मतदार याद्यांच्या विशेष सखोल पुनरिक्षणाचे सुधारित वेळापत्रक जाहीर

मुंबई : भारत निवडणूक आयोगाने महाराष्ट्रातील विधानसभा मतदारसंघांच्या मतदार याद्यांच्या विशेष सखोल पुनरिक्षणाचे (Special Intensive Revision – SIR) सुधारित वेळापत्रक जाहीर केले आहे. गृहभेटींद्वारे गणना प्रपत्र भरून घेण्याचा कार्यक्रम दि. १७ ऑगस्ट २०२६ रोजी समाप्त झाला असून, त्यानंतर या कार्यक्रमांतर्गत मतदान केंद्रांचे सुसूत्रीकरण आणि प्रारूप मतदार याद्या तयार करण्यासंबंधीची तांत्रिक प्रक्रिया पूर्ण करण्याच्या उद्देशाने वेळापत्रकात ही सुधारणा करण्यात आली आहे.

सुधारित वेळापत्रकानुसार मतदान केंद्रांचे सुसूत्रीकरण व पुनर्रचना २४ ऑगस्ट २०२६ पर्यंत पूर्ण करण्यात येणार आहे. त्यानंतर ३१ ऑगस्ट २०२६ रोजी प्रारूप मतदार यादी प्रसिद्ध करण्यात येणार आहे.तदनंतर दि. ३१ ऑगस्ट ते ३० सप्टेंबर २०२६ या दावे व हरकतीच्या कालावधीत ज्या नागरिकांची नावे प्रारूप मतदार यादीत समाविष्ट झालेली नसतील असे नागरिक तसेच १ ऑक्टोबर २०२६ या दिनांकास किंवा त्यापूर्वी वयाची १८ वर्षे पूर्ण करणारे नवीन मतदार आपले नाव मतदार यादीत समाविष्ट करण्यासाठी ऑनलाइन किंवा ऑफलाइन पद्धतीने अर्ज क्र. ६ सादर करू शकतात.दि. ३१ ऑगस्ट ते २९ ऑक्टोबर २०२६ या कालावधीत नोटिसांबाबतची कार्यवाही तसेच प्राप्त दावे व हरकती निकालात काढण्याबाबतची कार्यवाही करण्यात येईल आणि तदनंतर अंतिम मतदार यादी दि. ०४ नोव्हेंबर २०२६ रोजी प्रसिद्ध करण्यात येईल, अशी माहिती मुख्य निवडणूक अधिकारी कार्यालयाने प्रसिद्धीपत्रकाद्वारे दिली आहे.