सेलू तहसीलदारांनी लक्ष घालून १७ सप्टेंबरपूर्वी मानधन देण्याची मागणी
सेलू : सेलू नगर पालिका, परभणी महानगरपालिका तसेच जिल्हा परिषद व पंचायत समिती निवडणुका पार पडून ९ महिने उलटले तरी सेलू तालुक्यातील मास्टर ट्रेनर्सना अद्याप निवडणूक भत्ता व मानधन मिळालेले नाही. अखेर निवडणूक भत्ता गेला कुठे ? असा सवाल उपस्थित करीत, सेलू तहसीलदारांनी लक्ष घालून १७ सप्टेंबरपूर्वी सन्मानपूर्वक मानधन देण्याची मागणी करण्यात येत आहे.
डिसेंबर २०२५ मधील निवडणुकांसाठी सेलू तालुक्यातील विविध शाळांमधील ३० ते ३५ शिक्षक कर्मचारी यांची मास्टर ट्रेनर म्हणून नियुक्ती झाली होती. या कर्मचाऱ्यांनी ईव्हीएमचे एफएलसी, सिलिंग, प्रशिक्षण, साहित्य वाटप-संकलन आणि मतमोजणी अशी सर्व महत्त्वाची कामे चोख पार पाडली. निवडणूक प्रक्रियेतील सर्व घटकांना मानधन वाटप झाले असताना केवळ मास्टर ट्रेनर्सना वगळल्याने कर्मचाऱ्यांमध्ये नाराजीचा सूर आहे. यासंदर्भात १३ मार्च आणि १७ ऑगस्ट २०२६ रोजी व्हाटस् संदेशाद्वारे कळवून तसेच वारंवार पाठपुरावा करूनही प्रशासनाकडून टोलवाटोलवी सुरू आहे, असे या कर्मचाऱ्यांचे म्हणणे आहे. त्यामुळे तहसीलदार डॉ.शिवाजी मगर यांनी या प्रकरणात स्वतः लक्ष घालून संबंधित कर्मचाऱ्यांचा भत्ता, मानधन आणि ओटी १७ सप्टेंबरपूर्वी सन्मानपूर्वक द्यावा, अशी मागणी करण्यात आली आहे.
