परभणी, दि. १ : सुधारणा व पुनर्वसन उपक्रमांतर्गत महाराष्ट्र कारागृह विभागाच्या ‘ब्रीद वाक्य सुधारणा व पुनर्वसन’ या संकल्पनेनुसार परभणी जिल्हा कारागृह येथे जिल्हा विधी सेवा प्राधिकरण व जिल्हा कारागृह, परभणी यांच्या संयुक्त विद्यमाने नशामुक्ती व स्वसंयमनाचा कार्यक्रम आयोजित करण्यात आला.
या कार्यक्रमास जिल्हा विधी सेवा प्राधिकरणाचे प्रमुख जिल्हा सत्र न्यायाधीश श्री. आर. एम. सादरंगी तसेच सचिव भूषण काळे यांनी मार्गदर्शन केले. कार्यक्रमात ब्रह्मकुमारी ईश्वरीय विश्व विद्यालय, परभणी येथील ब्रह्मकुमारी बी. के. शारदा यांनी कैद्यांना नशामुक्ती व ताण-तणावातून मुक्त होण्यासाठी मार्गदर्शन केले.अध्यक्षीय भाषणात श्री. काळे यांनी कारागृहातील कैद्यांनी नशामुक्त व तणावमुक्त जीवन जगण्यासाठी मनावर नियंत्रण ठेवण्याचे आवाहन केले. तसेच जीवनामध्ये घडलेल्या घटनांचा वारंवार विचार न करता त्याकडे सकारात्मक दृष्टिकोनातून पाहून स्वतःमध्ये बदल घडवून आणता येतो, याबाबत उदाहरणांसह मार्गदर्शन केले.ब्रह्मकुमारी बी. के. शारदा यांनीही त्यांना मनशांती, आत्मसंयमन आणि व्यसनमुक्त जीवन याबाबत मार्गदर्शन केले.या कार्यक्रमास जिल्हा विधी सेवा प्राधिकरणाचे सचिव भूषण काळे, जिल्हा कारागृह अधीक्षक पांडुरंग भुसारे, तुरुंगाधिकारी वर्ग-१ राजेंद्र मरळे, तुरुंगाधिकारी वर्ग-२ श्रीमती स्वाती जाधवर, ब्रह्मकुमारी बी. के. शारदा, अविनाश सनसईक तसेच कारागृहातील इतर कर्मचारी उपस्थित होते.*****
