सेलू-मानवतरोडवरील गोगलगावपाटीवर आंदोलन, पाथरीतही वाहतूक ठप्प
परभणी : जालना जिल्ह्यातील अंतरवाली सराटी या ठिकाणी मराठा आरक्षण संघर्षयोध्दा मनोज जरांगे पाटील यांनी सुरू केलेल्या बेमुदत उपोषणाच्या समर्थनार्थ परभणी जिल्ह्यातील सेलू – मानवतरोड-परभणी रस्त्यावरील गोगलगावपाटी तसेच पाथरी शहरात सकल मराठा समाजाच्या वतीने बुधवारी, २ सप्टेंबर २०२६ रोजी सकाळी साडेदहाच्या सुमारास जोरदार रास्तारोको आंदोलन करण्यात आले. यामुळे या मार्गावरील वाहतूक काही काळ ठप्प झाली होती.
पाथरी शहरात संतप्त आंदोलनकर्त्यांनी छत्रपती शिवाजी महाराज यांच्या पुतळा परिसरातील चौकात ठिय्या मांडून मराठा आरक्षणा संदर्भात जोरदार घोषणाबाजी केली. सरकारी पातळीवरील निर्णयाचा निषेध करीत हैद्राबाद गॅझेटनुसार कुणबी प्रमाणपत्र व त्यास वैधता द्यावी, यासह अन्य मागण्या केल्या. या मागण्या सरकारने मान्य न केल्यास तीव्र आंदोलनाचा इशारा संतप्त आंदोलनकर्त्यांनी दिला. दरम्यान, गुरुवारी आंदोलनकर्त्यांनी पाथरी शहर बंद ठेवण्याचा निर्णय घेतला आहे.
सेलूजवळील गोगलगाव पाटीवर आंदोलन
मनोज जरांगे पाटील यांच्या उपोषणाच्या समर्थनार्थ बुधवारी सेलू ते मानवतरोड रस्त्यावरील गोगलगाव पाटीवर सकल मराठा समाज बांधवांनी दोन तास रस्ता रोको आंदोलन केले. यावेळी जोरदार घोषणाबाजी करण्यात आली. आंदोलनामुळे वाहतूक काही काळ ठप्प झाली होती. शासनाने मनोज जरांगे पाटील यांच्या सर्व मागण्या मान्य कराव्यात आणि उपोषण सोडवावे, अशी मागणी आंदोलकांनी केली.
‘परभणी जिल्हा बंद’ ची हाक
परभणी : मराठा आरक्षण संघर्षयोध्दा मनोज जरांगे पाटील यांनी आरक्षणा संदर्भात सुरू केलेल्या बेमुदत उपोषणाच्या समर्थनार्थ येथील सकल मराठा समाज बांधवांनी गुरुवारी, ३ सप्टेंबर २०२६ रोजी ‘परभणी जिल्हा बंद’ चे आवाहन केले आहे. या संदर्भात सकल मराठा समाजबांधवांच्या एका शिष्टमंडळाने जिल्हा पोलिस अधिक्षकांना या संबंधीची माहिती निवेदनाद्वारे दिली आहे.
