सेलू : मोदी सरकारने कापसावर शून्य टक्के आयात कराची अधिसूचना रद्द करावी या प्रमुख मागणीसह अमेरिकेच्या ५० टक्के टॅरीफ विरोधात संयुक्त किसान मोर्चाच्या वतीने बुधवारी, ३ सप्टेंबर रोजी सेलू् येथील क्रांती चौकात जोरदार घोषणाबाजी करत तीव्र निदर्शने करण्यात आली.
या वेळी कॉम्रेड रामेश्वर पौळ, कॉंग्रेसचे मिलींद सावंत यांनी मोदी सरकारने अमेरिकेचे अध्यक्ष डोनाल्ड ट्रम्प यांच्यापुढे गुडघे टेकून अमेरिकेच्या ५० टक्के टॅरीफ धोरणास विरोध केला नाही. उलट कापसाच्या शून्य टक्के आयातची अधिसूचना काढली. त्यामुळे कापसाचे भाव २००० रुपये प्रतिक्विंटल घसरल्यामुळे कापूस उत्पादक शेतकरी देशोधडीला लागण्याचा धोका अधिक वाढला आहे. सर्व शेतमालाच्या आयात शुल्कात कपात केल्याने सोयाबीन, दुग्धजन्य पदार्थ, रेशीम उद्योगासह सर्वच शेतकरी संकटात सापडले आहेत तसेच निर्यातीला ब्रेक लागला आहे. त्यामुळे करोडो तरुणांना रोजगार, नोकऱ्यांना मुकावे लागणार आहे.
आंदोलनात कॉंग्रेसचे माजी नगराध्यक्ष हेमंतराव आडळकर, कॉम्रेड रामेश्वर माजी नगरसेवक मिलिंद सावंत, नगरसेवक शेख रहीम कॉम्रेड उध्दव पौळ, दत्तुसिंग ठाकुर, सुभाष शहाणे, ज्ञानेश्वर पौळ रोहिदास हातकडके, उद्धव नाना पौळ, नारायण पवार, रंगनाथ ताठे, शेख दिलावर, सुखानंद कटारे, जाहेद घौरी यांच्यासह अनेक नागरिक व शेतकरी कामगार सहभागी झाले होते. नायब तहसीलदार मोरे यांनी निवेदन स्वीकारले.
