विशेष सखोल पुनरिक्षण कार्यक्रमांतर्गत सेलू येथे राजकीय पक्ष प्रमुख व पत्रकारांची बैठकसहा. मतदार नोंदणी अधिकाऱ्यांची नियुक्ती
सेलू : भारत निवडणूक आयोगाच्या वतीने घोषित करण्यात आलेल्या मतदार याद्यांच्या विशेष सखोल पुनरिक्षण (SIR) कार्यक्रम २०२६ च्या अनुषंगाने सेलू येथे बुधवारी, ८ जुलै रोजी महत्त्वाची बैठक पार पडली. उपविभागीय अधिकारी तथा मतदार नोंदणी अधिकारी शैलेश लाहोटी सेलू यांच्या अध्यक्षतेखाली या बैठकीचे आयोजन करण्यात आले होते.
या बैठकीला विविध राजकीय पक्षांचे प्रमुख, प्रतिनिधी आणि पत्रकार बांधव मोठ्या संख्येने उपस्थित होते.निवडणूक आयोगाच्या आदेशानुसार ३० जून २०२६ पासून सर्व बीएलओ (BLO) मार्फत मतदारांना ‘एन्युमरेशन फॉर्म’चे वाटप आणि त्याचे डिजिटायझेशन करण्याचे काम सुरू करण्यात आले आहे. या कामाचा आढावा घेण्यासाठी आणि पुढील दिशा ठरवण्यासाठी ही बैठक घेण्यात आली, ज्यामध्ये उपस्थित राजकीय पक्ष प्रमुख व पत्रकारांना विविध महत्त्वपूर्ण सूचना व मार्गदर्शन करण्यात आले.
सेलू तालुक्यातील कामाची सद्यस्थिती
सेलू तालुक्याअंतर्गत एकूण १६५ मतदार यादी भाग असून एकूण मतदार संख्या १,४५,५९२ एवढी आहे. यापैकी आतापर्यंत ४८,३२२ (३३%) फॉर्म्सचे वाटप करण्यात आले असून, १५,५३२ (१०.६६%) फॉर्म्सचे डिजिटायझेशन पूर्ण झाले आहे. तालुक्यातील या कामाची प्रगती अधिक वाढवण्यासाठी प्रशासनाकडून आवश्यक ते प्रयत्न केले जात आहेत.या पुनरिक्षण मोहिमेवर प्रभावी नियंत्रण ठेवण्यासाठी आणि कामकाजाच्या सुलभतेसाठी शहरी भागासाठी चार आणि ग्रामीण भागासाठी सात सहायक मतदार नोंदणी अधिकाऱ्यांची नियुक्ती करण्यात आली आहे. शहरी भागासाठी: तहसीलदार डॉ. शिवाजी मगर, मुख्याधिकारी श्री. महेश गायकवाड, ना. तहसीलदार श्री. गजानन इनामदार आणि सहायक निबंधक श्री. संदीप तायडे यांची नियुक्ती करण्यात आली आहे. ग्रामीण भागासाठी गटविकास अधिकारी श्री. उदय जाधव, ना. तहसीलदार (निवडणूक) श्रीमती जयश्री कोल्हे, उपअभियंता (ग्रा. पाणी पुरवठा) श्री. कठाळू जाधव, गट शिक्षणाधिकारी श्री. गजानन वाघमारे, तालुका कृषी अधिकारी गुलाब शिंदे, उपविभागीय अधिकारी (गुणनियंत्रण उपविभाग) श्री. विजय काकडे आणि सा.बां. उपविभागाचे उपविभागीय अभियंता श्री. बळीराम माने यांची नियुक्ती करण्यात आली आहे.बैठकीतील महत्त्वाचे निर्देश- ज्या मतदारांचे आधीचे फोटो स्पष्ट आणि चांगले आहेत, त्यांचे नवीन फोटो घेण्याची आवश्यकता भासणार नाही. केवळ अस्पष्ट (Bluer) फोटो असणाऱ्या मतदारांचेच नवीन फोटो घेण्यात यावेत, असे स्पष्ट करण्यात आले आहे.
गावातील नागरिकांना किंवा कोणालाही बीएलओ संदर्भात काही तक्रारी असल्यास त्यांनी थेट कार्यालयाशी संपर्क साधून अवगत करावे.या संपूर्ण मोहिमेत सर्व राजकीय पक्षांनी बीएलओ कर्मचाऱ्यांना पूर्ण सहकार्य करावे, तसेच पत्रकार बांधवांनी आपापल्या दैनिक वृत्तपत्रांमधून या मोहिमेबाबत मोठ्या प्रमाणावर जनजागृती निर्माण करावी, असे आवाहन मतदार नोंदणी अधिकारी तथा उपविभागीय अधिकारी श्री. शैलेश लाहोटी यांनी केले. या बैठकीला तहसीलदार तथा सहायक मतदार नोंदणी अधिकारी डॉ. शिवाजी मगर यांचीही प्रमुख उपस्थिती होती.
