सेलूच्या नूतन कन्या प्रशालेची सुवर्ण कामगिरी; राज्यस्तरीय स्पर्धेसाठी निवड
सेलू : क्रीडा व युवक सेवा संचालनालय, महाराष्ट्र राज्य, पुणे आणि क्रीडा अधिकारी कार्यालय, छत्रपती संभाजीनगर यांच्या वतीने आयोजित विभागीय शालेय बॉक्सिंग क्रीडा स्पर्धेत श्रीमती लक्ष्मीबाई लालजी रामजी नूतन कन्या प्रशाला, सेलूच्या खेळाडू विद्यार्थिनींनी चमकदार कामगिरी केली आहे. या स्पर्धेत प्रशालेच्या स्वाती मुंजाभाऊ फासाटे हिने ६६ ते ६९ किलो वजन गटात सुवर्णपदक पटकावले असून, तिची राज्यस्तरीय स्पर्धेसाठी निवड झाली आहे.
विभागीय क्रीडा संकुलात झालेल्या अंतिम सामन्यात स्वातीने छत्रपती संभाजीनगरच्या नंदिनी पगारेला पराभूत करून हे यश मिळवले. तिच्या या कामगिरीमुळे प्रशालेला एक सुवर्णपदक मिळाले आहे.
या स्पर्धेत प्रशालेच्या तेजल रामदास सदाफळे (रौप्यपदक), तर समृद्धी शिंदे, भाग्यश्री इलग, वेदश्री नाईकनवरे या खेळाडूंनी कांस्यपदक मिळविले आहे. क्रीडा शिक्षक संगीता खराबे आणि किशोर ढोके यांचे खेळाडूंना मार्गदर्शन लाभले. तसेच, सायली पसरकर, अक्षरा पवार, आरती खाडे, गायत्री घोगरे, वेदिका बोराडे, दीपाली गाडे आणि हर्षदा गलबे यांनीही स्पर्धेत सक्रिय सहभाग घेतला. या यशाबद्दल संस्थेचे यशाबद्दल नूतन विद्यालय शिक्षण संस्थेचे अध्यक्ष डॉ. एस. एम.लोया, उपाध्यक्ष डी. के. देशपांडे, सचिव प्राचार्य डॉ. व्ही. के. कोठेकर, सहसचिव जयप्रकाशजी बिहाणी, शालेय समितीचे अध्यक्ष नंदकिशोरजी बाहेती, मुख्याध्यापिका एन. डी. पाटील, उपमुख्याध्यापक परसराम कपाटे, पर्यवेक्षक दत्तराव घोगरे शिक्षक व शिक्षकेतर कर्मचाऱ्यांनी खेळाडूंचे अभिनंदन केले आहे.
