वसमतच्या नरहर कुरुंदकर विद्यालयाच्या वतीने आयोजन
सेलू : वसमत तालुक्यातील कुरुंदा येथील नरहर कुरुंदकर माध्यमिक व उच्च माध्यमिक विद्यालयाच्या वतीने आयोजित विभागीय वक्तृत्व (३१जानेवारी) स्पर्धेत विवेकानंद विद्यालयाची विद्यार्थिनी कल्याणी योगेश्वर काष्टे हिने आपल्या वक्तृत्वाच्या जोरावर घवघवीत यश संपादन केले आहे. या स्पर्धेत तिने संपूर्ण विभागात द्वितीय क्रमांक पटकावून विद्यालयाच्या शिरपेचात मानाचा तुरा रोवला आहे.
नरहर कुरुंदकर यांच्या स्मृतीनिमित्त आयोजित या स्पर्धेत विभागातील अनेक नामांकित शाळांच्या विद्यार्थ्यांनी सहभाग नोंदवला होता. अत्यंत चुरशीच्या झालेल्या या स्पर्धेत कल्याणीने आपल्या प्रभावी शैलीत विषय मांडून परीक्षकांची मने जिंकली. या यशाबद्दल तिला रोख २,००० रुपये आणि सन्मानचिन्ह देऊन गौरवण्यात आले.तिच्या या यशाबद्दल सर्व स्तरांतून कौतुकाचा वर्षाव होत आहे. हरिभाऊ चौधरी, उपेंद्र बेल्लुरकर, करुणा कुलकर्णी,मुख्याध्यापक नामदेव एकशिंगे,अनिल कौसडीकर,रागिणी जकाते यांनी कल्याणीचे अभिनंदन केले. कल्याणीच्या या यशामुळे परिसरात तिचे विशेष कौतुक होत असून, शिक्षकांनीही तिच्या पुढील वाटचालीस शुभेच्छा दिल्या आहेत.
