अपूर्वा तंत्रनिकेतनमध्ये नवीन प्रवेशित विद्यार्थ्यांचे स्वागत
सेलू : ध्येयाशी प्रामाणिक राहून सातत्याने प्रयत्न केल्यास यश नक्कीच मिळते. उपलब्ध संधींचा फायदा घेऊन विद्यार्थ्यांनी व्यक्तिमत्त्व विकसित करावे. तसेच आत्मशिस्त, सकारात्मकता आणि आधुनिक तंत्रज्ञान आत्मसात करण्यावर भर द्यावा, असे मत श्रीराम प्रतिष्ठानचे संस्थापक अध्यक्ष डॉ. संजय रोडगे यांनी व्यक्त केले. सेलू येथील अपूर्वा तंत्रनिकेतन महाविद्यालयात नवीन प्रवेश घेतलेल्या प्रथम आणि थेट द्वितीय वर्षाच्या विद्यार्थ्यांसाठी स्वागत समारंभात मार्गदर्शन करताना डॉ. रोडगे बोलत होते. प्रमुख पाहुणे म्हणून महेश पाटील, प्रशासकीय अधिकारी प्रा. महादेव साबळे, प्राचार्य प्रा. अशोक बोडखे, प्रा.गजानन जाधव आदी मान्यवर उपस्थित होते. महेश पाटील यांनी ‘करिअरच्या संधी’ या विषयी सविस्तर माहिती दिली. प्राचार्य बोडखे यांनी महाविद्यालयाच्या शैक्षणिक वातावरणाची आणि मूल्यांची माहिती दिली. तर उपप्राचार्य जाधव यांनी वेळेचे व्यवस्थापन, सुविधा आणि कौशल्य विकासावर मार्गदर्शन केले. सूत्रसंचालन प्रा. सायली कोकड यांनी केले.
