प्रिन्स इंग्लिश स्कूलमध्ये राष्ट्रीय अवकाश दिन उत्साहात
सेलू : श्रीराम प्रतिष्ठान संचलित एल. के. आर. रोडगे प्रिन्स इंग्लिश स्कूलमध्ये २३ ऑगस्ट २०२५ रोजी ‘राष्ट्रीय अवकाश दिन’ मोठ्या उत्साहात साजरा करण्यात आला. श्रीराम प्रतिष्ठानचे संस्थापक अध्यक्ष डॉ. संजय रोडगे यांना ग्रामीण भागातील विद्यार्थ्यांसाठी शैक्षणिक क्षेत्रात दिलेल्या योगदानाबद्दल भारत सरकार आणि इसरोने ‘भारत गौरव पुरस्कार’ प्रदान करून सन्मानित केले आहे. याबद्दल त्यांचा सत्कार करण्यात आला. पुरस्कारामुळे त्यांच्या कार्याला नवी प्रेरणा मिळाली आहे, अशा भावना यावेळी व्यक्त करण्यात आल्या. या कार्यक्रमाला श्रीराम प्रतिष्ठानच्या सचिव डॉ. सविता रोडगे, प्रशासकीय अधिकारी प्रा. महादेव साबळे, मुख्याध्यापक कार्तिक रत्नाला, आणि सर्व शिक्षक उपस्थित होते.
कार्यक्रमाची सुरुवात भारतीय अंतराळ संशोधन संस्था (इसरो) च्या यशस्वी मोहिमांवर आधारित परिपाठाने झाली. यामध्ये इयत्ता १०वीच्या विद्यार्थ्यांनी लक्षवेधी सादरीकरण केले. विद्यार्थिनी आणि ‘रॉकेट सायंटिस्ट’ पूजा वायाळ हिने रॉकेट लॉन्चिंगचे प्रात्यक्षिक दाखवत विद्यार्थ्यांना मार्गदर्शन केले. तिच्यासह तनिष्का तेलभरे आणि तेजश्री चौधरी या विद्यार्थिनींचा सत्कार डॉ. संजय रोडगे यांच्या हस्ते करण्यात आला. कार्यक्रमाच्या यशस्वी आयोजनासाठी विज्ञान शिक्षकांनी विशेष पुढाकार घेतला.
विविध स्पर्धा आणि उपक्रम
- प्राथमिक विभाग: विद्यार्थ्यांनी इसरोच्या मोहिमांवर आधारित आकर्षक मॉडेल्स तयार केली.
- चित्रकला स्पर्धा: विद्यार्थ्यांनी आपली सर्जनशीलता दाखवत सुंदर चित्रे रेखाटली.
- माध्यमिक विभाग: विद्यार्थ्यांनी पॉवर पॉइंट प्रेझेंटेशन, भाषण स्पर्धा आणि क्विझ स्पर्धेत सहभाग घेऊन इसरोच्या कार्याला मानवंदना दिली.
‘क्युरिऑसिटी सायन्स अँड इनोव्हेशन ऍक्टिव्हिटी सेंटर’ची घोषणा
डॉ. संजय रोडगे यांनी यावेळी ‘क्युरिऑसिटी सायन्स अँड इनोव्हेशन ऍक्टिव्हिटी सेंटर’ची माहिती दिली. ते म्हणाले की, या केंद्रातून भविष्यात विद्यार्थ्यांना जीपीएस लोकेशनद्वारे रॉकेट लॉन्चिंगचे मार्गदर्शन दिले जाईल. त्यांच्या या उपक्रमामुळे विद्यार्थ्यांमध्ये वैज्ञानिक जिज्ञासा आणि नवनिर्मितीची भावना वाढीस लागेल.
