ज्ञानसाधना प्रतिष्ठान आणि प्रा.किरण सोनटक्के मित्रमंडळाची २३ वर्षाची परंपरा
परभणी : तालुक्यातील मांडाखळी येथील इंद्रायणी देवी माळावर देवराई या ठिकाणी इंद्रायणी देवी यात्रेनिमित्त मागील २३ वर्षांपासून ज्ञानसाधना प्रतिष्ठान आणि प्रा.किरण सोनटक्के मित्र मंडळाच्या वतीने महाप्रसादाचे आयोजन करण्यात येते. यावर्षीही २८ व २९ सप्टेंबर रोजी महाप्रसाद, चहा आणि पिण्याच्या पाण्याच्या वाटपाचे भव्य आयोजन करण्यात आले होते. ७० हजारावर भाविकांनी महाप्रसादाचा लाभ घेतला. देवीच्या दर्शनासाठी आणि इंद्रायणी देवी माळास देवराई मार्गे प्रदक्षिणा करण्यासाठी सातव्या माळेस दोन दिवसांत हजारो भाविक भक्त उपस्थित होते. सामाजिक बांधिलकी वृद्धिंगत करणारा हा उपक्रम प्रतिष्ठानचे अध्यक्ष प्रा.किरण सोनटक्के यांनी २३ वर्षांपूर्वी सुरू केला आहे. पंचक्रोशीतील भाविक भक्त मोठ्या उत्साहाने सेवेसाठी येत असतात. सातव्या माळेच्या दिवशी भीमराव वायवळ, डॉ.प्रल्हाद खुने, पोलिस उपनिरीक्षक गडदे, तावडे यांच्यासह अनेकांनी महाप्रसाद वाटप सेवा केली. या वेळी ज्ञानसाधना प्रतिष्ठानचे अध्यक्ष प्रा.किरण सोनटक्के, सिनेट सदस्य प्रा.शितल किरण सोनटक्के, शिवसांभ सोनटक्के, सरपंच नागेश शिराळ यांच्यासह ग्रामस्थ मंडळी, मित्र मंडळाचे सर्व पदाधिकारी सेवेसाठी पूर्णवेळ उपस्थित होते. ४ व ५ ऑक्टोबर रोजी पौर्णिमेलाही यात्रेच्या निमित्ताने महाप्रसादाचे आयोजन करण्यात आले आहे. भाविक भक्तांनी महाप्रसादाचा लाभ घ्यावा, असे आवाहन करण्यात आले आहे.
