ऑल इंडिया सैनिकी स्कूल प्रवेश परीक्षेत राष्ट्रीय पातळीवर ९१ वा, तर राज्यात १४ वा क्रमांक
सेलू जि.परभणी : सेलू येथील प्रिन्स इंग्लिश स्कूलचा इयत्ता सहावीचा विद्यार्थी शिवराज योगेश सूर्यवंशी याने ‘ऑल इंडिया सैनिकी स्कूल एन्ट्रन्स एक्झाम २०२६’ (AISSEE 2026) मध्ये सुवर्णयश संपादन केले आहे. शिवराजने ३०० पैकी २८६ गुण मिळवून राष्ट्रीय पातळीवर ९१ वा रँक, तर राज्य पातळीवर मुलांच्या गटात १४ वा रँक मिळवला आहे. त्याच्या या यशाने सर्व स्तरातून कौतुकाचा वर्षाव होत आहे. वयाच्या बाराव्या वर्षी देशपातळीवर शिवराजने मिळविलेले यश विद्यार्थ्यांसाठी निश्चितच प्रेरणादायी ठरणारे आहे.
देशसेवेचे ध्येय बाळगणाऱ्या शिवराजला सैन्यात जाण्यासाठी त्याची आई कल्पना सूर्यवंशी यांच्याकडून प्रेरणा मिळाली. आई खाजगी शाळेत शिक्षिका तर वडील ॲड.योगेश बाबुराव सूर्यवंशी हे वकील असल्याने घरातून शिक्षणाचे वातावरण लाभले. आई कल्पना यांनी युवराजचे गुण ओळखून त्याच्या शैक्षणिक प्रगतीवर विशेष लक्ष केंद्रीत केले. आईने दाखविलेल्या देशसेवेच्या स्वप्नाला गवसणी घालण्यासाठी त्याने प्रवेश परीक्षेच्या तयारीसाठी कराड येथील मानेगाव कॅम्पस मधील ‘आय कॅन ट्रेनिंग इन्स्टिट्यूट’ मध्ये प्रवेश घेतला. तेथील संचालक सुयोग शिंदे आणि त्यांच्या संपूर्ण टीमने शिवराजकडून करून घेतलेली तयारी आणि योग्य मार्गदर्शन, शिवराजाच्या सातत्यपूर्ण परिश्रमाला पालकांकडून मिळालेले प्रोत्साहन हे महत्त्वपूर्ण ठरले आहे. शिवराजच्या या यशाने सूर्यवंशी कुटुंबात आनंदाचे वातावरण असून, विविध क्षेत्रातील मान्यवरांकडून त्यांचे अभिनंदन होत आहे. भविष्यात भारतीय सैन्यात अधिकारी होऊन देशाची सेवा करण्याचा मानस शिवराजने व्यक्त केला आहे.
ऑल इंडिया सैनिकी स्कूल प्रवेश परीक्षा २०२६ (AISSEE) : ऑल इंडिया सैनिकी स्कूल प्रवेश परीक्षा (AISSEE)ही नॅशनल टेस्टिंग एजन्सी (NTA) द्वारे दरवर्षी आयोजित केली जाते. या परीक्षेच्या माध्यमातून देशभरातील सैनिकी शाळांमध्ये इयत्ता ६ वी आणि ९ वीसाठी प्रवेश दिला जातो. २०२६ च्या शैक्षणिक वर्षासाठीची ही परीक्षा १८ जानेवारी २०२६ रोजी देशभर पार पडली. या परीक्षेचा २७ फेब्रुवारी २०२६ रोजी अधिकृत निकाल घोषित करण्यात आला. अधिकृत वेबसाइट exams.nta.nic.in
