काव्य क्षेत्रातील योगदानाबद्दल सन्मान, १० मार्च रोजी पुणे येथे वितरण
परभणी : परभणी येथील ज्येष्ठ कवी इंद्रजित भालेराव यांना यंदाचा ‘कविश्रेष्ठ कुसुमाग्रज स्मृती सन्मान’ जाहीर झाला आहे. काव्य क्षेत्रातील त्यांच्या महत्त्वपूर्ण योगदानाबद्दल विदिशा विचार मंचतर्फे हा पुरस्कार प्रदान करण्यात येणार आहे.
कुसुमाग्रजांच्या स्मृतिदिनी, मंगळवार, १० मार्च २०२६ रोजी सायंकाळी ५.३० वाजता पुणे येथे हा पुरस्कार प्रदान सोहळा होणार आहे. माजी संमेलनाध्यक्ष, ज्येष्ठ साहित्यिक आणि संत साहित्याचे अभ्यासक डॉ. सदानंद मोरे यांच्या हस्ते भालेराव यांना हा सन्मान प्रदान केला जाईल. विदिशा विचार मंचच्या संस्थापक-संचालक ममता क्षेमकल्याणी यांनी ही माहिती दिली.या पुरस्काराचे हे चौथे वर्ष आहे. यापूर्वी पहिल्या वर्षी ज्येष्ठ कवी अरूण म्हात्रे, दुसऱ्या वर्षी ज्येष्ठ कवी वसंत आबाजी डहाके आणि तिसऱ्या वर्षी ज्येष्ठ कवयित्री डॉ. अरूणा ढेरे यांना हा सन्मान प्रदान करण्यात आला आहे.इंद्रजित भालेराव यांनी मराठी काव्य क्षेत्रात मोठे योगदान दिले आहे. त्यांचे पंधरा काव्यसंग्रह, ललितलेखसंग्रह, सहा संपादने आणि इतर साहित्य प्रकाशित झाले आहे. महाराष्ट्र शासनासह विविध संस्थांच्या पुरस्कारांनी त्यांना सन्मानित करण्यात आले आहे. त्यांच्या कवितांचे हिंदी आणि इंग्रजी भाषेतील अनुवाद साहित्य अकादमीने प्रकाशित केले आहेत.महाराष्ट्र, कर्नाटक, गोवा या राज्यांच्या अभ्यासक्रमांसह राष्ट्रीय अभ्यासक्रमांतही त्यांच्या साहित्याचा समावेश आहे. त्यांनी विविध साहित्य संमेलनांचे अध्यक्षपदही भूषवले आहे.
