लेझीम पथकासह मिरवणुकीने वेधले लक्ष
परभणी : महसूल विभागाच्या निर्देशानुसार दि. १ ते ७ ऑगस्ट दरम्यान राबविण्यात आलेल्या महसूल सप्ताहाचा समारोप कार्यक्रम गुरुवारी, ७ ऑगस्ट रोजी गंगाखेड येथे मान्यवरांच्या उपस्थितीत उत्साहात पार पडला.
गंगाखेड येथील उपविभागीय कार्यालयाच्या इमारतीत पार पडलेल्या या समारोप सोहळ्याचे उद्घाटन आमदार रत्नाकर गुट्टे यांच्या हस्ते करण्यात आले. कार्यक्रमास आमदार राजेश विटेकर, जिल्हाधिकारी रघुनाथ गावडे, अपर जिल्हाधिकारी डॉ. प्रताप काळे, निवासी उपजिल्हाधिकारी अनुराधा ढालकरी, उपविभागीय अधिकारी जीवराज डापकर, उपजिल्हाधिकारी अरुणा संगेवार, अनिता भालेराव, जिल्हा पुरवठा अधिकारी विलास मुसळे, उपविभागीय अधिकारी शैलेश लाहोटी, संगिता चव्हाण, उदयसिंह भोसले, पोलीस उपविभागीय अधिकारी डॉ. दिलीप टिपरसे, तहसीलदार माधव बोथीकर, उषाकिरण श्रुंगारे, कृऊबा सभापती साहेबराव भोसले, महसूल कर्मचारी संघटनेचे नानासाहेब भेंडेकर, माजी जिप सदस्य किशनराव भोसले यांच्यासह जिल्ह्यातील विविध तहसील कार्यालयांचे अधिकारी, कर्मचारी उपस्थित होते.
प्रारंभी गंगाखेड तहसील कार्यालय ते उपविभागीय अधिकारी कार्यालयापर्यंत लेझीम पथक, तुतारी, उंट, घोड्यांसह महसूल विभागाचा संदेश देणारी भव्य मिरवणूक काढण्यात आली. या मिरवणुकीत मान्यवर, अधिकारी, कर्मचारी व नागरीक सहभागी झाले होते. कार्यक्रमात महसूल विभागातील उत्कृष्ट कामगिरी करणाऱ्या अधिकारी व कर्मचाऱ्यांना प्रशस्तीपत्र देऊन गौरविण्यात आले व लाभार्थ्यांना आधार किटसह विविध प्रमाणपत्रांचे वाटप करण्यात आले. उपस्थित मान्यवरांनी महसूल सप्ताहनिमित्त विविध लोकोपयोगी उपक्रम राबविल्याबद्दल प्रशासनाचे कौतुक केले. प्रास्ताविकात श्री.डापकर यांनी महसूल सप्ताहात शेतकरी, कामगार, विद्यार्थी, उद्योजक व सर्वसामान्य नागरिकांच्या प्रलंबित कामांना प्राधान्य देत त्या कामांची पूर्तता करण्यात आल्याचे सांगितले. आभार पालमचे तहसीलदार कैलाशचंद्र वाघमारे यांनी मानले.
या सोहळ्याला महसूल विभागातील अधिकारी, कर्मचारी, आशा कार्यकर्त्या, अंगणवाडी सेविका व नागरिक मोठ्या संख्येने उपस्थित होते. कार्यक्रम यशस्वी करण्यासाठी गंगाखेड, पालम व पूर्णा उपविभागातील तहसीलदार, नायब तहसीलदार, मंडळ अधिकारी, तलाठी यांच्यासह कार्यालयातील कर्मचाऱ्यांनी परिश्रम घेतले.
