सेलू येथील कुरेशी समाजात आदर्श विवाहाचे उदाहरण
सेलू : मुलगी पाहण्यासाठी गेलेल्या मुलाकडील मंडळींनी मुलगी पसंत पडल्यानंतर लगेचच लग्नाचा निर्णय घेतला आणि दोन्ही कुटुंबांच्या सहमतीने त्याच वेळी विवाह लावून आणला. वाढत्या महागाईला आणि जुन्या रुढी-परंपरांना फाटा देत, कुरेशी समाजाने एक आदर्श निर्माण केला आहे.
सेलू येथील प्रतिष्ठित व्यापारी हाजी युनूस राहिमोद्दीन कुरेशी यांचा पुतण्या आयान मोहम्मद कुरेशी हा जालना जिल्ह्यातील शहागड येथे अन्सर गुलाम अहमद यांची मुलगी नुसेबा हिला पाहण्यासाठी गेला होता. मुलगा-मुलगी एकमेकांना पसंत पडल्यानंतर दोन्ही कुटुंबांनी विचारविनिमय केला. सध्याची महागाई आणि समाजातील आर्थिक परिस्थिती लक्षात घेऊन, त्यांनी अनावश्यक खर्चाला फाटा देत त्याच वेळी विवाह सोहळा पार पाडण्याचा निर्णय घेतला.
त्यानंतर कुरेशी समाजातील काझींना बोलावून त्यांचा निकाह लावून देण्यात आला. या सोहळ्याला व्याही अन्सर गुलाम अहमद कुरेशी, आसेफ कुरेशी, अनिस कुरेशी, हाजी इल्यास कुरेशी, इम्रान कुरेशी, असीम कुरेशी यांच्यासह दोन्हीकडील नातेवाईक उपस्थित होते. मुलगी पाहण्याच्या कार्यक्रमातच विवाह पार पडल्याने दोन्ही कुटुंबांचे समाजात कौतुक होत आहे.
