श्री गणेश नाट्य मंडळातील हौशी कलावंतांचा सहभाग, सामाजिक विषयावर होते प्रबोधन
मंठा : श्रीगणेशोत्सवानिमित्त मंठा तालुक्यातील हेलस येथे मनोरंजनासोबत समाज प्रबोधनपर नाट्य प्रयोग सादरीकरणाची शेकडो वर्षांची नाट्य परंपरा जेष्ठ कलाकारांच्या मार्गदर्शनात तरूण हौशी कलावंतांकडून आजही जपली जात आहे. या वर्षी बुधवार व गुरूवार ( ता.३ व ता.४ सप्टेंबर) नाट्य प्रयोग सादर होणार आहेत. अध्यक्ष दीपक खराबे, विश्वनाथ संत आणि भारतनाना खराबे यांनी ही माहिती दिली. ग्रामदैवत श्री गणेश मंदिर संस्थान च्या वतीने आयोजित गणेशोत्सवाचे हे १३४ वे वर्ष आहे. श्री योगेश महाराज कुलकर्णी यांच्या रसाळ वाणीतून श्रीमद् भागवत कथेला सोमवारी सुरवात झाली, श्री ज्ञानेश्वरी पारायण, विश्वनाथ खराबे यांच्या नेतृत्वाखाली हरिपाठ, भजन, गवळण, भारूड, हरिजागर आदी कार्यक्रम होत आहेत. पौर्णिमेला ‘श्रीं’ चा पालखी मिरवणूक सोहळा पंचक्रोशीतील भाविकांचे श्रद्धास्थान आणि आकर्षण ठरत आलेला आहे. दरवर्षी ७० ते ८० गावांच्या भजनकरी दिंड्या सहभागी होतात.
नाटकांसोबतच लळितमध्ये विविध सोंग सादर करून समाजातील अनिष्ट रूढी परंपरावर प्रकाश टाकला जातो. सामाजिक विषयांवर विडंबनात्मक सादरीकरणातून जनजागृती केली जाते. या वर्षी बुधवार, ३ सप्टेंबर रोजी रात्री ८ वाजता ” हा स्पर्श मायेचा” हा सामाजिक आणि कौटुंबिक नाट्य प्रयोग, तर गुरुवारी ” पुढारी दोन- खुनी कोण? ” हा सामाजिक वग नाट्य प्रयोग सादर होणार आहे. यामध्ये गावातील तरूण कलाकारांचा सहभाग असून दिग्दर्शन गणेश उद्धव खराबे करीत आहेत.- भारतनाना खराबे, नाट्य कलावंत, श्री गणेश नाट्य मंडळ, हेलस
या उत्सवाचे आणखी वैशिष्ट्य म्हणजे श्री गणेश नाट्य मंडळ हेलसच्या वतीने तीन अंकी नाट्यप्रयोग सादर केले जातात. त्रिमूर्ती गायनाने सुरूवात होते. आजपर्यंत राम गणेश गडकरी यांचे “एकच प्याला” सह झाशीची राणी, भगवा झेंडा, मोहित्यांची मंजुळा, सखू आली पंढरपुरा, सरपंच खुनी, पाटील बेईमानी, राजा हरिश्चंद्र, सिंहाचा छावा, गोकुळचा चोर आदी अनेक नाटके सादर करण्यात आली आहेत. दिवंगत दगडप्पा साखरे, खंडेराव कुलकर्णी, रंगराव कुलकर्णी, विश्वनाथ चेअरमन, भगवानराव कुलकर्णी, रावसाहेब पाराजी, किसनराव पाटील, हरिभाऊ टेलर, रामेश्वर उद्धवराव, विठ्ठल आणेभाऊ, काशीनाथ हरिभाऊ, रुस्तुम दुकानदार, पुंजाराम सहदेव तसेच जेष्ठ नाट्य कलावंत साहेबराव गुरूजी, शंकरराव हेलसकर आदींसह अनेकांनी या व्यासपीठावर कला सादर करून नाट्य परंपरा जोपासली आहे. आता ही नाट्य परंपरा तरुण पिढी जोपासत असून हौशी कलावंत बालासाहेब खराबे, कैलास खराबे, गणेश खराबे, नामदेव खेत्रे बजरंग खराबे, माऊली खराबे आदींसह अनेक तरुण मोठ्या उत्साहाने नाट्यप्रयोगात सहभागी हतात. महिलांची भूमिका आजही पुरुषच करतात हे विशेष.
श्री गणेश नाट्य मंडळाच्या वतीने धार्मिक व ऐतिहासिक आणि ज्वलंत सामाजिक विषयांवर आजवर अनेक नाट्य प्रयोग सादर झालेले आहेत. ऐंशी नव्वदच्या दशकात फारसे साधन साहित्य नसताना केवळ कला आणि अभिनयाच्या उत्कृष्ट सादरीकरणाने रसिकांच्या मनावर हेलसच्या नाट्य कलावंतांनी आपला वेगळा ठसा उमटवला आहे. पंचक्रोशीतील अनेक गावांत प्रयोग सादर केले गेले. १३४ वर्षांची ही सामाजिक प्रबोधनाची नाट्य परंपरा आज तरूण पिढी जोपासत आहे. ही अतिशय आनंदाची बाब आहे.- शंकरराव हेलसकर, साहेबराव गुरूजी, जेष्ठ नाट्य कलावंत, श्री गणेश नाट्य मंडळ, हेल
