व्याख्याते मिलिंद पोंक्षे यांचे विद्यार्थिनींना आवाहन
सेलू/परभणी : परभणी पोलीस अधीक्षक कार्यालयाच्या वतीने ‘एक संवाद विद्यार्थ्यांशी’ हा उपक्रम १० डिसेंबर रोजी सेलू् येथील लक्ष्मीबाई लालजी रामजी नूतन कन्या प्रशालेत आयोजित करण्यात आला होता. या वेळी प्रमुख व्याख्याते जाणीव जागृती फाऊंडेशनचे मिलिंद पोंक्षे यांनी विद्यार्थिनींशी संवाद साधला. ‘मुलींनो सावध राहा, सजग राहा’ असे आवाहन त्यांनी केले.
पोंक्षे यांनी सांगितले की, “विद्यार्थिनींनो बोलायला शिका, नाही म्हणायला शिका, व्यक्त व्हा, पालकांशी सातत्याने संवाद साधत राहा आणि प्रत्येक गोष्टीकडे जागरूकतेने पहा”. विद्यार्थिनींना समाजातील विविध अत्याचाराविरोधात कसे सजग राहावे, काय काळजी घ्यावी याविषयी श्री.पोंक्षे यांनी मार्गदर्शन केले. विद्यार्थिनींनी विचारलेल्या प्रश्नांचे व समस्यांचे समाधान करीत संवाद साधला.
व्यासपीठावर सहाय्यक पोलीस निरीक्षक श्रीमती पुंगणे, सहाय्यक पोलीस निरीक्षक श्रीमती सोनीत, दामिनी पथक प्रमुख अस्मिता मोरे, नूतन विद्यालय शिक्षण संस्थेचे प्रशासकीय अधिकारी प्राचार्य डॉ.शरद कुलकर्णी, मुख्याध्यापिका निशा पाटील, उपमुख्याध्यापक परशुराम कपाटे, पर्यवेक्षक दत्तराव घोगरे यांची प्रमुख उपस्थिती होती.
प्रास्ताविक श्रीमती सोनीत यांनी केले. या कार्यक्रमाला नूतन कन्या प्रशाला, नूतन विद्यालय आणि कस्तुरबा गांधी बालिका विद्यालय येथील विद्यार्थिनी उपस्थित होत्या.
सूत्रसंचालन कीर्ती राऊत यांनी केले, तर आभार भालचंद्र गांजापूरकर यांनी मानले. कार्यक्रमाच्या यशस्वीतेसाठी शशिकांत देशपांडे, किशोर ढोके, आणि बालाजी देऊळगावकर यांनी परिश्रम घेतले.
