पावसात कुठलंही चुकीचं धाडस करू नका

पालकमंत्री मेघना बोर्डीकर : स्वतःला आणि कुटुंबाला सुरक्षित ठेवा

परभणी, दि. १९ : राज्यभरात मुसळधार पाऊस सुरू आहे, ओढे, नदी, नाले दुथडी भरून वाहत आहेत. आपल्या परभणी जिल्ह्यातही अनेक ठिकाणी पुरसदृश परिस्थिती आहे. सेलू तालुक्यातील मौजे राजवाडी येथील दुधना नदीवर असलेल्या पुलावर जी दुर्घटना घडली ती दुर्दैवी आहे, प्रशासन वाहून गेलेल्या दोघांचा शोध घेत आहे. सर्व जनतेला विनंती की, पावसात कुठलंही चुकीचं धाडस करू नका. प्रशासन देत असलेल्या सूचनांचं पालन करा, प्रशासनाला सहकार्य करा स्वतःला आणि कुटुंबाला सुरक्षित ठेवा, असे आवाहन पालकमंत्री मेघना साकोरे-बोर्डीकर यांनी केले आहे.

आज सायंकाळी ५.०० वा. सुमारास मौजे राजवाडी तालुका सेलू, जि. परभणी येथे दुधना नदीवर असलेल्या पुलावरून वाहत असलेल्या पाण्याच्या प्रवाहामुळे छबुराव श्रीरंगराव जावळे वय अंदाजे ४५ वर्षे राहणार गुळखंड व मारुती रामभाऊ हरकळ वय अंदाजे ५० वर्षे राहणार वालूर हे २ नागरिक मोटरसायकलने प्रवास करीत असताना पाण्यात वाहून गेले असल्याची घटना घडली आहे. जिल्हा आपत्ती व्यवस्थापन अंतर्गत प्रशासन वाहून गेलेल्या दोघांचा शोध घेत आहे.

परभणी जिल्ह्यातील येलदरी व निम्न दुधना हे धरणे, ढालेगाव, तारुगव्हान, मुद्गल, दिग्रस हे उच्च पातळी बंधारे आणि झरी, करपरा, मासोळी, मुळी व पिंपळदरी हे निम्न पातळी व मध्यम प्रकल्प इत्यादी पूर्ण क्षमतेने भरले असल्यामुळे सदर धरणे, उच्च पातळी बंधारे, मध्यम प्रकल्प, साठवण तलाव इत्यादीमधून सद्यस्थितीत अतिरिक्त पाण्याचा विसर्ग करण्यात येत आहे. त्यामुळे जिल्ह्यातील गोदावरी, पुर्णा व दुधना आणि सदर न‌द्यांच्या उपनद्या, ओढे नाले इत्यादी तुडुंब भरून वाहत आहेत नागरिकांनी पर्यटन स्थळे, नदीकाठ व रस्त्यावरून पाणी वाहत असेल अशा ठिकाणाहून धोकादायकरित्या प्रवास करणे टाळावे, स्थानिक पोलिस प्रशासनाकडून नागरिकांची सुरक्षितता निश्चित करणे आदीसह प्रतिबंधात्मक उपाययोजना करण्यात आल्या आहेत.

नागरिकांनी मान्सून कालावधीत आपत्कालीन परिस्थितीमध्ये जिल्हा आपत्ती व्यवस्थापन नियंत्रण कक्ष दूरध्वनी क्रमांक ०२४५२–२२६४००, टोल फ्री क्रमांक १०७७, आपत्ती व्यवस्थापन अधिकारी मो. ९९७५०१३७२६ या क्रमांकावर संपर्क करावा.

मुसळधार पावसाने शेतकरी बांधवांचे आणि शेतीचे नुकसान होत आहे. शेतकऱ्यांनी कुठल्याही परिस्थितीत खचून जाऊ नये, राज्य शासन आपल्या पाठीशी आहे, असा दिलासा पालकमंत्री श्रीमती बोर्डीकर यांनी दिला आहे.