: पालकमंत्री मेघना बोर्डीकर यांचे आवाहन, परभणीत महसूल सप्ताहाचे उद्घाटन
परभणी : महसूल सप्ताहाच्या माध्यमातून सरकारच्या लोककल्याणकारी योजना सर्वसामान्यांपर्यंत पोहोचवून त्यांना लाभ मिळवून द्यावा, असे आवाहन राज्याच्या सार्वजनिक आरोग्य व कुटुंबकल्याण राज्यमंत्री तथा परभणी जिल्ह्याच्या पालकमंत्री मेघना साकोरे-बोर्डीकर यांनी शुक्रवारी केले. महसूल दिन आणि महसूल सप्ताहाच्या उद्घाटनप्रसंगी आयोजित कार्यक्रमात त्या बोलत होत्या. वसंतराव नाईक मराठवाडा कृषी विद्यापीठाच्या सभागृहात जिल्हा प्रशासनाच्या वतीने या कार्यक्रमाचे आयोजन करण्यात आले होते. यावेळी जिल्हाधिकारी रघुनाथ गावडे, पोलीस अधीक्षक रवींद्रसिंह परदेशी, जिल्हा परिषदेच्या मुख्य कार्यकारी अधिकारी नतिशा माथुर, मनपा आयुक्त धैर्यशील जाधव, अपर जिल्हाधिकारी डॉ. प्रताप काळे, निवासी उपजिल्हाधिकारी अनुराधा ढालकरी यांच्यासह महसूल विभागाचे अधिकारी व कर्मचारी उपस्थित होते.
पालकमंत्री बोर्डीकर म्हणाल्या की, १ ते ७ ऑगस्ट या कालावधीत आयोजित केलेल्या महसूल सप्ताहाच्या माध्यमातून नागरिकांसाठी विविध उपक्रम राबवावे. महसूल कर्मचाऱ्यांना सर्वसामान्यांची सेवा करण्याची उत्तम संधी मिळाली आहे, त्यामुळे त्यांनी तळागाळातील लोकांपर्यंत शासनाचे उपक्रम पोहोचवून त्यांना योजनांचा लाभ मिळवून द्यावा. पंतप्रधान नरेंद्र मोदी यांच्या ‘विकसित भारत-२०४७’ आणि मुख्यमंत्री देवेंद्र फडणवीस यांच्या ‘विकसित महाराष्ट्र-२०४७’ या संकल्पनेत सहभागी होऊन परभणी जिल्ह्याला विकासात अग्रेसर करूया, असे आवाहनही त्यांनी केले.
जिल्हाधिकारी रघुनाथ गावडे यांनी उपस्थित कर्मचाऱ्यांना शुभेच्छा देत महसूल सप्ताह यशस्वीपणे राबविण्याचे आवाहन केले. श्रीमती ढालकरी यांनी प्रास्ताविकात प्रशासनाच्या मागील वर्षातील कामांचा आढावा सादर केला. यावेळी महसूल विभागातील सेवानिवृत्त अधिकारी-कर्मचारी, उत्कृष्ट अधिकारी-कर्मचारी आणि गुणवंत विद्यार्थ्यांचा मान्यवरांच्या हस्ते सत्कार करण्यात आला.
फोटो ओळी :
परभणी जिल्हा प्रशासनाच्या वतीने आयोजित महसूल सप्ताहाचे उद्घाटन पालकमंत्री मेघना साकोरे-बोर्डीकर यांच्या हस्ते शुक्रवारी झाले. या वेळी जिल्हाधिकारी रघुनाथ गावडे, डॉ.प्रताप काळे, रविंद्र सिंह परदेशी आदींसह मान्यवरांची उपस्थिती होती.
पूर्ण…
