निवृत्त शिक्षकाची मोठी फसवणूक, सेलू पोलीस ठाण्यात गुन्हा दाखल
परभणी : सेलू येथील मौलाना आझाद नगर भागात राहणाऱ्या एका ७० वर्षीय निवृत्त शिक्षकाला सायबर चोरट्यांनी विविध प्रलोभने आणि अटकेची भीती दाखवून तब्बल ९७ लाख ८३ हजार रुपयांना गंडा घातल्याची धक्कादायक घटना समोर आली आहे. या प्रकरणी सेलू पोलीस ठाण्यात अज्ञात आरोपींविरुद्ध गुन्हा दाखल करण्यात आला आहे.
फिर्यादी नागनाथ शंकरराव कुरमुडले हे आपल्या घरी असताना ४ मार्च ते ८ एप्रिल २०२६ या कालावधीत ही घटना घडली. संशयित आरोपी रवि शर्मा व इतरांनी ७४७९९८२५३१, +८५५९६७०६८६७९, ८७९१६३९९८२, ७०४११०१५९४, ७०४१०७३३९८, ७०९४५९८८०५ या मोबाईल क्रमांकावरून फिर्यादीशी संपर्क साधला. आरोपींनी फिर्यादीला सांगितले की, तुमच्या आधार कार्ड आणि पॅन कार्डचा वापर करून मुंबईत बनावट बँक खाते उघडण्यात आले आहे. या खात्यावरून दोन कोटी रुपयांचे व्यवहार झाले असून तुम्ही त्यातून २० लाख रुपये कमिशन घेतल्याचा खोटा बनाव रचण्यात आला.सायबर चोरट्यांनी फिर्यादीला अटकेची आणि निवृत्ती वेतन बंद करण्याची भीती घातली. तसेच मुलाची नोकरी घालवण्याची धमकी देऊन कोणालाही काही न सांगण्यास बजावले. या दबावाखाली येऊन फिर्यादीने आपली पोस्टातील मुदत ठेव मोडली, पेन्शनवर कर्ज काढले आणि पत्नीचे दागिने गहाण ठेवून जमा झालेली रक्कम आरोपींनी दिलेल्या विविध खात्यांवर आरटीजीएस व चेकद्वारे वर्ग केली. अशा प्रकारे वेळोवेळी एकूण ९७ लाख ८३ हजार रुपये घेऊन फिर्यादीची आर्थिक फसवणूक करण्यात आली.या प्रकरणी पोलीस निरीक्षक दीपक बोरसे यांच्या मार्गदर्शनाखाली सहाय्यक पोलीस निरीक्षक पुंगळे यांनी गुन्हा दाखल केला असून पुढील तपास सुरू आहे. प्रशासनाने नागरिकांना अशा कोणत्याही बनावट फोन कॉल्सना बळी न पडण्याचे आवाहन केले आहे.
