१०० कोटी नामजप संकल्पांतर्गत आयोजन
सेलू : शहरातील ब्राम्हण गल्ली येथील श्री दत्त मंदिरात २ ऑगस्ट रोजी दुपारी ४ ते ५ या वेळेत ‘दिगंबरा दिगंबरा श्रीपाद वल्लभ दिगंबरा’ या पवित्र नामाचा सामूहिक जप मोठ्या भक्तिभावाने व उत्साहात पार पडला.
श्रीमत् प. प. स. योगानंद सरस्वती स्वामी महाराजांच्या समाधी शताब्दी सोहळ्यानिमित्त श्री योगानंद सरस्वती संस्थान गुंजचे राजेशभाई देसाई महाराज यांच्या संकल्पनेतून ‘दिगंबरा दिगंबरा श्रीपाद वल्लभ दिगंबरा’ या दिव्य महामंत्राचा १०० कोटी नामजप करण्याचा संकल्प करण्यात आला आहे. त्या अनुषंगाने या नामजप सोहळ्याचे आयोजन करण्यात आले होते.कार्यक्रमाची सुरुवात श्री दत्तमूर्तीच्या पूजनाने व दत्तत्रिपदीने झाली. त्यानंतर उपस्थित भाविकांनी एकचित्ताने नामाचा अखंड जप करत परिसर भक्तिमय करून सोडला. कार्यक्रमाच्या शेवटी महाप्रसादाचे वाटप करण्यात आले. या सोहळ्याच्या यशस्वीतेसाठी आयोजक मंडळ, स्वयंसेवक आणि दत्तभक्तांनी परिश्रम घेतले.
