श्रीरामजी भांगडिया यांच्या शतकोत्तर रजत जयंती महोत्सवी वर्षानिमित्त नूतन महाविद्यालयाचा उपक्रम
सेलू : सेलू येथील नूतन विद्यालय शिक्षण संस्था संचालित, नूतन महाविद्यालयाच्या वतीने बुधवारी १० जून २०२६ रोजी दुपारी ४.०० वाजता नूतन विद्यालयात एका विशेष शेतकरी मेळाव्याचे आयोजन करण्यात आले आहे. श्रीरामजी भांगडिया यांच्या शतकोत्तर रजत जयंती महोत्सवी वर्षानिमित्त हा उपक्रम हाती घेण्यात आला आहे.
या मेळाव्यात ‘अवर्षण प्रवण क्षेत्रातील शेतकऱ्यांनी पेरणी व पेरणीनंतर घ्यावयाची काळजी’ या विषयावर तज्ज्ञांकडून सखोल मार्गदर्शन केले जाणार आहे. हा कार्यक्रम सेलू येथील नूतन विद्यालयाच्या रा. ब. गिल्डा सभागृहात होईल. उद्घाटक म्हणून परभणी येथील वसंतराव नाईक मराठवाडा कृषी विद्यापीठाचे संशोधक डॉ. अरविंद पंडागळे उपस्थित राहणार आहेत. अध्यक्षस्थानी नूतन विद्यालय शिक्षण संस्थेचे अध्यक्ष डॉ. एस. एम. लोया असतील. मेळाव्यात मुख्य मार्गदर्शक म्हणून पेडगाव (ता. जि. परभणी) येथील प्रगतशील शेतकरी मंगेश देशमुख आणि वसंतराव नाईक मराठवाडा कृषी विद्यापीठाचे संशोधक डॉ. गजानन गडदे उपस्थित राहून संवाद साधणार आहेत.याप्रसंगी संस्थेचे सचिव डॉ. व्ही. के. कोठेकर आणि सहसचिव जयप्रकाश बिहाणी यांची प्रमुख उपस्थिती लाभणार आहे. हा कार्यक्रम यशस्वी करण्यासाठी संयोजक दत्तरावजी पावडे, डॉ. शरद कुलकर्णी, प्राचार्य डॉ. उत्तम राठोड आणि वनस्पतीशास्त्र विभाग प्रमुख डॉ. पी. आर. कंठाळे यांच्यासह महाविद्यालयाची संपूर्ण टीम परिश्रम घेत आहे. परिसरातील शेतकरी बांधवांनी या मेळाव्यास आवर्जून उपस्थित राहून मार्गदर्शनाचा लाभ घ्यावा, असे आवाहन आयोजकांच्या वतीने करण्यात आले आहे.
