पालकमंत्री मेघना बोर्डीकर यांचे महापालिका,नगरपालिकांना निर्देश
परभणी : स्वच्छ भारत मिशन (नागरी) अंतर्गत स्वच्छ सर्वेक्षण-२०२६ च्या अनुषंगाने पालकमंत्री मेघना साकोरे-बोर्डीकर यांनी दूरदृश्यप्रणालीद्वारे महापालिका, सर्व नगरपरिषद व नगरपंचायतींच्या स्वच्छतेचा आढावा घेतला. जिल्ह्याला उत्कृष्ट स्थान मिळवून देण्यासाठी स्वच्छतेच्या निकषांची काटेकोर अंमलबजावणी करण्याचे निर्देश त्यांनी दिले.
शहरात दृश्यमान स्वच्छता राखणे, उघडे कचरा डेपो हटवणे, १०० टक्के घरांमधून ओला व सुका कचरा स्वतंत्र संकलित करणे आणि त्यावर प्रक्रिया करण्यावर त्यांनी भर दिला. तसेच सार्वजनिक स्वच्छतागृहांची देखभाल, नाले-गटारांची सफाई, एकेरी वापराच्या प्लास्टिकवर दंडात्मक कारवाई आणि सी-टिफिन व भित्तीचित्रांद्वारे व्यापक जनजागृती करण्याचे आदेश दिले. नागरिकांच्या तक्रारींचे निवारण, लोकप्रतिनिधी व संस्थांचा सहभाग आणि दैनंदिन कामांचे दस्तऐवजीकरण करून प्रगती अहवाल सादर करण्याचे निर्देश पालकमंत्र्यांनी आयुक्त व मुख्याधिकाऱ्यांना दिले.
