सेलू न्यायालयाचा आरोपीला दुप्पट भरपाई देण्याचा आदेश
सेलू : मा. न्यायाधीश गौरव अ. तराळ यांनी दोन धनादेशाच्या वेगवेगळ्या प्रकरणात आरोपीला धनादेशाच्या दुप्पट रक्कम, फिर्यादीस नुकसान भरपाई म्हणून एका महिन्यात देण्याबाबत व दोन महिन्याची शिक्षा दि.२२/०७/२०२६ रोजी सुनावली आहे.
घटनेची हकीकत अशी की, भिकमचंद श्रीमल गादिया यांना हिरा टिकमचंद परदेशी यांनी हातउसणे घेतलेल्या ५०,००० च्या रक्कमेबाबत दोन धनादेश १०,००० व ४०,००० रूपयाचे दिले होते. पण आरोपीच्या खात्यात पुरेशी रक्कम नसल्याने दोन्ही धनादेश अनादर झाले होते. त्याबाबत फिर्यादी गादिया तर्फे न्यायदंडाधिकारी प्रथमवर्ग सेलू येथे एस.एस.सी.क्र. २५३/२०१६, एस.एस.सी.क्र. २५४/२०१६ अन्वये दि. १७/११/२०१६ रोजी हिरा टिकमचंद परदेशी यांच्या विरोधात धनादेश अनादरबाबत १३८ एन.आय.ॲक्ट अन्वये फिर्याद दिली होती.त्या अनुषंगाने फिर्यादी व आरोपी यांच्या साक्षीपुरावा व युक्तीवादाअंती न्यायालयाने दोन्ही प्रकरणात आरोपी विरुद्ध गुन्हा सिद्ध झाल्याचे नमूद करून एस.एस.सी.क्र. २५३/२०१६ या प्रकरणात आरोपीस धनादेशाच्या दुप्पट रक्कम म्हणजेच ८०,००० रूपये नुकसान भरपाई एका महिन्यात फिर्यादीस देण्याचे आदेश आपल्या न्याय निर्णयात पारीत केले. तसेच उपरोक्त रक्कम न दिल्यास एक महिना साधा कारावास तसेच शिक्षा म्हणून दोन महिने साधा कारावासाची, तर दुसऱ्या धनादेशामध्ये एस.एस.सी.क्र. २५४/२०१६ मध्ये धनादेशाच्या दुप्पट रक्कम म्हणजेच २०,००० रूपये नुकसान भरपाई एका महिन्यात फिर्यादीस देण्याचे आदेश आपल्या न्याय निर्णयात पारीत केले. तसेच उपरोक्त रक्कम न दिल्यास एक महिना साधा कारावास तसेच दोन महिने साधा कारावासाची शिक्षा अशी दोन्ही प्रकरणात न्यायदंडाधिकारी प्रथमवर्ग सेलू श्री. जी.अ.तराळ यांनी दि. २२/०७/२०२६ रोजी शिक्षा सुनावली आहे. फिर्यादी भिकमचंद श्रीमल गादिया तर्फे ॲड.एल.एच.खोना यांनी युक्तीवाद केला.
