शैक्षणिक नवोपक्रमासाठी छत्रपती संभाजीनगर येथे गौरव
पूर्णा : अभिनव विद्या विहार प्राथमिक शाळा, पूर्णा येथील शिक्षक विठ्ठल जयवंतराव अनमुलवाड यांना त्यांच्या नाविन्यपूर्ण अध्यापन पद्धती व विद्यार्थ्यांच्या सर्वांगीण विकासासाठी केलेल्या उल्लेखनीय कार्याबद्दल ग्लोबल स्टार टीचर अवॉर्ड २०२६ प्रदान करण्यात आला.
छत्रपती संभाजीनगर येथील मराठवाडा महसूल प्रशिक्षण प्रबोधिनी सभागृहात पार पडलेल्या भव्य समारंभात विविध क्षेत्रातील मान्यवरांच्या हस्ते हा पुरस्कार प्रदान करण्यात आला.या प्रसंगी डॉ. सुनील गायकवाड (माजी खासदार, लातूर), डॉ. मंगल पांचाळ (ज्येष्ठ साहित्यिका व उप मुख्य कार्यकारी अधिकारी, छत्रपती संभाजीनगर), लीना पंडित (सुप्रसिद्ध अभिनेत्री), कृष्णकुमार दडके (संमेलनाध्यक्ष व समाजसेवक, परभणी), दिलीप घेवंदे (ज्येष्ठ अभिनेते व निर्माता) तसेच प्रा. डॉ. बी. एन. खरात (संचालक, समृद्धी पब्लिकेशन व किल्ले पर्यटन महोत्सव फाउंडेशन, महाराष्ट्र) यांची प्रमुख उपस्थिती होती.अनमुलवाड यांच्या अध्यापनातील नवोपक्रम, विद्यार्थीकेंद्रित दृष्टिकोन आणि शैक्षणिक गुणवत्ता वाढीसाठी केलेल्या प्रयत्नांचे मान्यवरांनी विशेष कौतुक केले. त्यांच्या कार्यामुळे विद्यार्थ्यांमध्ये आत्मविश्वास व शिकण्याची आवड निर्माण झाल्याचे यावेळी नमूद करण्यात आले.पुरस्कार स्वीकारताना विठ्ठल अनमुलवाड यांनी हा सन्मान आपल्या विद्यार्थ्यांना व शाळेतील सहकाऱ्यांना समर्पित करत भविष्यातही शिक्षण क्षेत्रात अधिक नाविन्यपूर्ण उपक्रम राबविण्याचा निर्धार व्यक्त केला.
