तरुणाईला राष्ट्रीय कर्तव्य बजावण्याची शपथ
सेलू (प्रतिनिधी ): महर्षि वाल्मिकी शासकीय औद्योगिक प्रशिक्षण संस्था, सेलू येथे नगर परिषद सार्वत्रिक निवडणूक – २०२५ साठी मतदान जनजागृती शपथ उत्साहात पार पडली. यामध्ये विद्यार्थी आणि कर्मचाऱ्यांची लक्षणीय उपस्थिती होती. स्वीप कक्ष समन्वयक गटशिक्षणाधिकारी गजानन वाघमारे यांनी विद्यार्थ्यांना लोकशाही प्रक्रियेत मतदानाचे महत्त्व समजावून सांगितले. तरुण मतदारांनी आपल्या अधिकाराचा सक्रीय वापर केल्यास समाजातील सकारात्मक बदलाला गती मिळते, यावर त्यांनी भर दिला. यानंतर कीर्ती राऊत यांनी उपस्थित सर्वांना मतदानाची शपथ दिली. स्वच्छ, पारदर्शक आणि मजबूत लोकशाहीसाठी प्रत्येक मतदाराने निश्चितपणे मतदान करावे, असा संकल्प यावेळी करण्यात आला. या उपक्रमाच्या यशस्वीतेसाठी संस्थेतील कर्मचाऱ्यांनी परिश्रम घेतले.
