जिल्हाधिकारी संजयसिंह चव्हाण यांची माहिती, यंत्रणा सज्ज
२ डिसेंबर रोजी सात नगरपालिका क्षेत्रांत सार्वजनिक सुट्टी
कलम १६३ लागू
परभणी : परभणी जिल्ह्यातील ७ नगरपालिका सदस्यपदासाठी आणि थेट अध्यक्षपदाच्या सार्वत्रिक निवडणुकांकरिता मंगळवार, २ डिसेंबर २०२५ रोजी मतदान होणार आहे. मतदारांना सकाळी ७.३० ते सांयकाळी ५.३० या कालावधीत मतदान करता येणार आहे. लोकशाहीच्या बळकटीकरणासाठी कोणत्याही प्रलोभनाला बळी न पडता मतदारांनी निर्भयपणे आपल्या मतदानाच अमूल्य हक्क बजवावा, असे आवाहन जिल्हाधिकारी संजयसिंह चव्हाण यांनी केले आहे. परभणी जिल्हयातील गंगाखेड, जितूर, सेलू, मानवत, पाथरी, सोनपेठ आणि पूर्णा नगर परिषदेच्या निवडणुकीसाठी मतदान होणार आहे. मतदान केंद्रांवर मतदारांसाठी आवश्यक त्या सुविधा उपलब्ध करुन देण्यात आल्या आहेत. मतदानाच्या पार्श्वभुमीवर नगर पालिका क्षेत्रात कडक सुरक्षा बंदोबस्त तैनात करण्यात आला आहे. मतदाराला मतदार यादीतील आपले नाव शोधण्याकरिता https://mahasecvoterlist.in हे संकेतस्थळ विकसित केले आहे. नाव किंवा मतदार ओळखपत्र क्रमांक नमूद करून मतदार यादीतील आपले नाव शोधता येईल. निवडणुकीची मतमोजणी बुधवार, ३ डिसेंबर २०२५ रोजी होणार आहे.
कलम १६३ लागू
दरम्यान, सार्वत्रिक निवडणूकीची संपूर्ण प्रक्रीया शांततेत, निर्भय व न्याय्य वातावरणात पार पाडण्याच्या दृष्टीकोनातून कायदा व सुव्यवस्था अबाधीत राखण्यासाठी ज्या ठिकाणी मतदान होणार आहे, त्या ठिकाणी भारतीय नागरिक सुरक्षा संहिता-२०२३ चे कलम १६३ लागू करण्यात आले आहे. या कलमान्वये जिल्हादंडाधिकारी संजयसिंह चव्हाण यांनी असे निर्देश दिले की, नगरपालिका सार्वत्रिक निवडणूक-२०२५ अंतर्गत परभणी जिल्ह्यात ज्या ठिकाणी मतदान केंद्रावर मतदान होणार आहे, त्या ठिकाणी १०० मीटर परिसरात सर्व पक्षाचे कार्यालये, उमेदवारांचे मंडपे, सर्व दुकाने, मोबाईल, कॉडलेस फोन, पेजर, वायरलेससेट, ध्वनीक्षेपके, सर्व प्रकारचे फेरीवाले व इतर ईलेक्ट्रॉनिक उपकरणे, निवडणूकीच्या कामाव्यतिरीक्त खाजगी वाहने, संबंधीत पक्षांचे उमेदवारांचे चिन्हाचे प्रदर्शन व निवडणूक कामाव्यतिरीक्त इतर व्यक्तीस प्रवेश करण्यास प्रतिबंध करण्यात येत आहे.
मतदानाच्या दिवशी सार्वजनिक सुट्टी
परभणी : राज्य शासनाने राज्यातील नगर परिषदा व नगर पंचायतीच्या निवडणुकांच्या अनुषंगाने मतदानाचा दिवस, मंगळवार, दि. २ डिसेंबर, २०२५ रोजी परभणी जिल्ह्यातील ७ नगर परिषद स्थानिक स्वराज्य संस्थेच्या मतदारसंघात (गंगाखेड, जितूर, सेलू, मानवत, पाथरी, सोनपेठ आणि पूर्णा नगर परिषद) अधिसूनेद्वारे सार्वजनिक सुट्टी जाहीर केली आहे. ही सार्वजनिक सुट्टी उपरोक्त नमूद करण्यात आलेल्या मतदारसंघाच्या क्षेत्रातील जे मतदार कामासाठी त्या त्या मतदारसंघांच्या बाहेर असतील त्यांना देखील लागू राहील. तसेच उपरोक्त नमूद करण्यात आलेल्या नगरपरिषद क्षेत्रातील केंद्र शासनाच्या शासकीय कार्यालये, निमशासकीय कार्यालये, सार्वजनिक उपक्रम, बँका आदींनाही ही सार्वजनिक सुट्टी लागू राहील, असे अधिसुचनेत नमूद करण्यात आले आहे.
